Ymyrt úıirilip, kóz baılanyp bara jatqan shaq edi. Aǵa leıtenant Rýslan Kravsýnovtyń telefony shyr ete tústi. Beımezgil ýaqytta soǵylǵan telefonnan jetken aqparatqa qaraǵanda áldebir qala turǵyny etjaqyn týysy, jasy jer ortasynan asqan aǵaıynynyń habarsyz ketkeninen kúdiktenip, páterine barǵanymen, esiginen ene almaı tur eken. Dirildep shyqqan daýysy ishki jan sezimin uqtyryp turǵandaı.
Bázbireýler bolsa «bálkim uıyqtap jatqan shyǵar» dep uzyn arqan, keń tusaýǵa salar edi. Adamdardyń taǵdyryna eshqashan beıjaı qaramaıtyn aǵa leıtenant kómek qolyn sozýǵa asyqty. Ile jetken. Birinshi qabatta jalǵyzbasty zeınetker turady eken. Shamaly ýaqyt myqtap jabylǵan esigin qaǵyp kórdi. Tyrs etken dybys joq. Mazasyzdanǵan týystary jedel járdem shaqyryp jatyr. Áıtse de, istiń baıybyna kóz jetkizbeı taǵy bolmaıdy. Mundaıda ýaqyttyń jyldam júretini bar. Aǵa leıtenant kóp oılanyp turmastan birinshi qabattaǵy páterdiń terezeni julyp alyp, ishke endi. Qaýsap turǵan terezeden adam ómiri qymbat emes pe?! Bas aman bolsa, keıin jóndele jatar. Dál osy ýaqytta sýyt habar túsken jedel járdem brıgadasy da jetip úlgerdi. Rýslan Kravsýnov úıge engen soń úı ıesin birden tapqan. Es-tússiz, sulyq jatyr eken. Áıtse de júregi soǵady.
Ile syrqat aýrýhanaǵa jetkizildi. Alǵashqy dıagnoz – ınsýlt. Dárigerlik kómek ýaqytynda kórsetilgennen keıin kórer jaryǵy bar qarııa anyq ajaldan aman qaldy. Onda da, óz mindetine joǵary jaýapkershilikpen qaraıtyn polısııa qyzmetkeriniń arqasynda. Aıtpaqshy, bul Rýslannyń janashyrlyq jasaǵan jalǵyz oqıǵasy emes, osydan birneshe aı buryn taǵy osyndaı bir oqıǵa boldy. Ol joly polısııa qyzmetkerine páterge úshinshi qabattaǵy balkon arqyly kirýge týra kelgen. Sóıtse, ájeı aýyr halde, es-tússiz jatyr eken. Janashyr jannyń ábjil qımylynyń arqasynda tatar dámi taýsylmaı aman qaldy. Basyna kún túskende naq bir perishtedeı taza kóńilmen qasynan tabylatyn janashyr jandardyń kómegi qandaı keremet.
Aqmola oblysy,
Atbasar aýdany