Almatydaǵy Ulttyq kitaphanada belgili satırık-jazýshy, Jazýshylar odaǵy Satıra keńesiniń tóraǵasy Ermahan Shaıhyulynyń «Satıra sarqyty», túrik tilinde jaryq kórgen «Áıelim bazarda», balalarǵa arnalǵan «Medına máziri» atty úsh kitaby kópshilikke tanystyryldy.
Tusaýkeser tizginin qolǵa alǵan fılologııa ǵylymdarynyń doktory, professor Qanseıit Ábdezuly jazýshynyń shyǵarmashylyǵyna sholý jasap, qalamgerlik ereksheligine toqtaldy. Aıtqyshtyǵymen aty aýyzǵa iligip, «maǵynasy maıysqan maqaldarymen» tanylyp, satıranyń mysal, epıgramma, feleton sııaqty túrli janryn shymshyma tilimen shyraıyn keltirgen qalamgerdiń satıraǵa ákelgen jańalyqtary men artyqshylyǵyn atap ótti.
Ermahan Shaıhyulynyń qolynan qalamy túspeı, satıranyń jalyna qol artyp, qyzmet etip kele jatqanyna otyz jyldyń júzi boldy. Únemi izdenis ústinde júretin satırıktiń «Birtúrli kitap», «Sandalǵan saýal», «Jurt aıtady», «Mynaýyń jyndy eken», «Shyldyr shúmek» kitaptaryn oqyrman qaýym jyly qabyldady. Tulpardy taı kúninen tanyǵan belgili satırık Ǵabbas Qabysh «Ermahan – ázilge jomart, syqaqqa sarańdaý. Ol Ospanhan Áýbákirov, Kópen Ámirbek, Seıit Kenjahmetov, Muhtar Sherimniń endigi men boılyǵyndaǵy jaıdary jigit» dep baǵalaǵanyn moderator tilge tıek etti.
Avtor «Qaıtys bolǵan satıra sarbazdarynyń rýhyna arnaımyn» dep usynyp otyrǵan «Satıra sarqyty» kitabynda ómirden biri erte, biri kesh ótken tulǵalardyń zamana týraly tolǵaǵan aqjarma áńgimesi júıelengen. Respýblıkalyq birneshe basylymda syn-syqaq betin júrgizgen E.Shaıhyuly aldyńǵy býyn qalamgerler salǵan órnekti óz úlgisinde jańǵyra tústi. Qalamger jańa kitabynda ádebıette úlgi, ózine ustaz bolǵan aǵalarynyń aıaýly esimin jańǵyrta otyryp, satıra sardarlarynyń eńbegin el esine salady. Satıra janrynyń negizin qalaǵan S.Adambekov, O.Áýbákirov, B.Qydyrbekuly, Ú.Ýaıdın, S.Ábdiraıymuly, Q.Sultanbaev, T.Keneev, L.Esenov, A.Naımantaev, taǵy basqa ádebıet jáne óner sańlaqtarynyń shyǵarmashylyǵymen tanystyrady.
«Satıra sarqyty» atty kitaby – satırıktiń shyǵarmashylyq úlken belesi. Satırık qalamgerlerdiń úlken-kishisi bar, keshegi ótken alyptary men ardageri bar, óz mektebin, sheberlik sheberhanalaryn jasap ketkenderi bar, barlyǵyn túgel saralap, tarazylaıtyn osynaý eńbekti satırık-jazýshy Ermahan Shaıhyulynyń búgingi belestegi bas kitaby dep baǵalaımyn», dedi professor Qanseıit Ábdezuly.
Kitap 11 taraýdan turady. «Qazirgi qazaq satırasy», «Satıra sańlaqtary», «Satıra sardarlarymen suhbat», «Áriptester ázili», «Ázilkeshter ázili» atty jeke-dara júk kótergen ataýynyń ózi kitaptyń aqparattyq, tanymdyq hám ǵylymı mańyzyn ańǵartyp turǵandaı.
Kitaphanadaǵy tusaýkeser is-sharasynda E.Shaıhyuly «Áıelim – bazarda» kitabyn túrik tiline tárjimalaǵan belgili jazýshy-aýdarmashy Málik Otarbaev pen túrik tilinde jaryq kórýine muryndyq bolǵan Eýrazııa Jazýshylar odaǵynyń tóraǵasy Iаkýb О́miroǵlyǵa alǵysyn bildirdi. Al barsha balaǵa bazarlyq retinde usynylyp otyrǵan úshinshi kitap – «Medına máziri» jańyltpashtardan turady. Belgili balalar aqyny Dúısen Maǵlumov bul kitapqa engen jańyltpashtardyń negizinen balalar basylymynda jaryq kórgenin aıtty. Aıtýynsha, jańyltpashtardyń tili jeńil, tez jattalady. Bul jınaq – balalardyń este saqtaý qabiletin damytyp, tilin ustartýǵa taptyrmaıtyn qural. Sondaı-aq ádebı jıynǵa týǵan jerdiń sálemin arnaıy ala kelgen Tursynhan Qurmanbekov qalyń túrkistandyqtyń atynan qurmet kórsetip, qalamgerdiń mereıin tasytty.
Qazaqstan Jazýshylar odaǵy basqarmasy tóraǵasynyń orynbasarlary, aqyndar Qasymhan Begmanov men Baýyrjan Jaqyp, Ál-Farabı atyndaǵy QazUÝ professorlary Káken Qamzın men Aıgúl Ramazan, M.Áýezov atyndaǵy Ádebıet ınstıtýtynyń bas ǵylymı qyzmetkeri, ádebıettanýshy-ǵalym Nurdáýlet Aqysh, sondaı-aq belgili qalamgerler Jumash Kenebaı, Bolat Sharahymbaı, Tileýqabyl Myńjasar, Gúlzeınep Sádirqyzy óz quttyqtaýlarynda satırık-jazýshynyń shyǵarmashylyq eńbegine toqtalyp, onyń ádebıet pen jýrnalıstik kásipke degen adaldyǵyn, ultjandy qasıetin kisilik turpatymen baılanystyra áserli estelikter tizbegin tarqatty.
ALMATY