Qaraǵandy oblysy, Temirtaý qalasynyń oń jaǵalaýyndaǵy sý qubyrynda tehnologııalyq aqaý boldy.
Bul týraly qala ákimi Oraz Táýirbekov óziniń áleýmettik jelidegi paraqshasynda habarlady.
«Qurmetti temirtaýlyqtar, keshe oń jaǵalaý turǵyndaryn aýyzsýmen qamtamasyz etetin sý qubyry ýchaskesinde paıda bolǵan tehnologııalyq aqaýǵa baılanysty, biz bul aımaqqa aýyzsý berýdi ýaqytsha toqtatýǵa májbúr boldyq. Qalyptasqan jaǵdaıdyń barlyq saldaryn eskere otyryp jáne qoldanystaǵy zańnamanyń normalaryn basshylyqqa ala otyryp, men tótenshe jaǵdaı rejımin jarııaladym. Onyń aıasynda biz aýyzsýmen jabdyqtaýdyń shtattyq rejımin qysqa merzimde qalpyna keltirý úshin barlyq qajetti sharalardy qabyldaımyz», dedi vıdeomálimdemesinde qala basshysy.
Qazirgi ýaqytta qajetti materıal tolyǵymen alyndy. Jóndeý jumystary júrgizilip jatyr. Jaýapty organ jóndeý jumystary eki kúnde aıaqtalatynyn habarlady.
Qaraǵandy oblysy