Buǵan deıin 12-13 sáýir aralyǵynda Tokıodaǵy Ariake Coliseum kesheninde ótetin Bıllı Djın Kıng kýboginiń irikteý týrnırinde elimizdiń tennısshileri qandaı quramda óner kórsetetinin jarııa etken edik.
Kúni keshe ǵana atalǵan básekede Japonııanyń áıelder quramasynyń namysyn qorǵaıtyn oıynshylardyń da esimderi belgili boldy. Solardyń arasyndaǵy eń myqtysy – Nao Hıbıno. 29 jastaǵy Aıtı prefektýrasynyń týmasy «Úlken dýlyǵa» sanatyndaǵy týrnırlerde ekinshi kezeńnen asa almaǵanymen, basqa jarystarda eleýli tabysqa qol jetkizip júr. Kúnshyǵys eliniń birinshi raketkasy bul kúnderi WTA reıtınginde 76-orynda tur. Qazirgi kezde óner kórsetip júrgen japondyq tennısshiler arasynda bul – ázirge eń úzdik kórsetkish.
Desek te sarapshylar atalǵan jarystaǵy Japonııanyń «basty qarýy» retinde Nao Hıbınonyń emes, ataqty Naomı Osakanyń esimin atap jatyr. Buǵan qarsy ýáj aıta almaımyz. 26 jastaǵy tennısshi búgingi tańda WTA tiziminde nebári 229-oryndy enshilegenimen, kezinde Osakanyń kortta qalaı erkin oıqastap, keremet oıyn órnegin kórsetkenin sportsúıer qaýym jaqsy biledi. 2018-2021 jyldar aralyǵynda ol AQSh pen Aýstralııanyń ashyq birinshilikterin eki retten utyp, WTA jarystarynda jeti márte top jardy. Tasy órge domalap turǵan tusta Naomı álemniń birinshi raketkasy atandy. Sonyń arqasynda 2019 (37 mln dollar) ben 2021 jyldardyń qorytyndysy boıynsha (57 mln dollar) eń kóp tabys tapqan baqýatty sportshylardyń tiziminde jeke-dara kósh bastady.
2022 jyldyń aıaǵynda Naomı dekrettik demalysqa shyqty. Byltyr jazda náresteli boldy. Sodan kortqa bıyl ǵana oralyp, Brısbendegi týrnır men Aýstralııanyń ashyq birinshiliginde baq synady. Bir jarym jyldaı ýaqytqa sozylǵan úzilisten keıin Osakaǵa babyna ený ońaı bolǵan joq. Brısbende ol ekinshi kezeńde súrinse, Melbýrnde tusaýkeser kezdesýinde jeńilis tapty. Biraq soǵan qaramastan onyń áleýeti áli de asa joǵary baǵalanyp tur.
Joǵaryda esimderi atalǵan ataqty tennısshilerden bólek, Qazaqstanǵa qarsy kezdesýde Maı Hontama, Ena Sıbahara jáne Sıýko Aoıama kortqa shyǵady. Úzdikter tiziminde 108-oryndy enshilegen Hontama jekelegen saıysta el namysyn qorǵaıdy. Al qalǵan ekeýi juptyq jarystarda óte jaqsy oınap júr. Máselen, Sıbahara men Aoıama byltyr Aýstralııanyń ashyq birinshiliginiń aqtyq synyna deıin alqynbaı jetse, 2021 jyly Ýımbldonnyń jartylaı fınalynda oınady. 2020 jyly olar Rolan Garrostyń shırek fınalyna shyqty. Sonymen qatar Sıýko Aoıama Azııa chempıonatynda tórt ret (1 altyn, 1 kúmis, 2 qola) jeńis tuǵyryna kóterilip, Azııa oıyndarynda qola medaldy moınyna ildi.
Esterińizge sala keteıik, elimizdiń eń úzdik tennısshisi Elena Rybakına qazirgi kezde Parıj Olımpıadasyna daıyndalyp jatqandyqtan Japonııadaǵy jarystan bosatyldy. Kúnshyǵys elinde Iýlııa Pýtınseva, Zarına Dıas, Anna Danılına, Jibek Qulambaeva jáne Arýjan Saǵyndyqovaǵa senim artylyp otyr. Qazirgi kezde ulttyq qurama komandalardyń reıtınginde jerlesterimiz 9-orynda tursa, japondar 20-satyǵa turaqtady. Sondyqtan da otandastarymyz aldaǵy synaqtan súrinbeı ótedi degen oıdamyz.