Jetisýlyq tótenshe jaǵdaı departamenti kúshteri men quraldary Abaı oblysyndaǵy sý tasqynyna qarsy kúresý úshin kómekke ketti. Búginde 23 qutqarýshy, 6 birlik tehnıka, 4 júzý quraly men 8 motopompa jumyldyrylǵan. Olar kórshi óńirde topan sý kezinde joǵalǵan adamdardy izdestirip jatyr.
Jetisýlyq qutqarýshylar abaılyq áriptesterimen birlesip, Aıagóz aýdanyndaǵy sharýa qojalyǵy aýmaǵynan tórt adamdy evakýasııalaǵan, onyń ekeýi – bala. Qutqarylǵan jandarǵa eshqandaı medısınalyq kómek qajet emes. Qazir jerlesterimiz Abaı óńirinde bir aptadan beri iz-túzsiz ketken turǵyndardy izdestirý jumystarymen belsene aınalysyp jatyr.
«Jetisý oblysynda sý tasqyny jaǵdaıy qalypty. Búginde 3,7 km sý burý arnalaryn salý jáne sý tasqyny qaýpi bar ózen arnalarynyń 4,6 km mehanıkalyq tazalaý men 1,9 km jaǵalaýlaryn bekitý jumystary júrgizilip jatyr. Turǵyndardyń alańdaýyna eshqandaı sebep joq. Jalǵan aqparattarǵa ermeýge shaqyramyz», deıdi oblystyq tótenshe jaǵdaılar departmenttiniń basshysy, polkovnık Nurlan Bekbosynov.
Jalǵan aqparat degennen shyǵady, jaqynda áleýmettik jelide Qyzylaǵash sý qoımasynyń qorshaýy jarylǵaly turǵanyn aıtyp, el ishi dúrlikken edi. Aqsýlyq aǵaıyn azar da bezer kúıge túsken. Degenmen jaýapty mamandar sý arnasynan aspaǵanyn jetkizdi. Qazirgi ýaqytta sý qoımasynyń kólemi 41,9 mln tekshe metrdi quraıdy. Oqıǵa ornyna «Qazvodhoz» RMK Jetisý fılıalynyń mamandary táýlik boıy kezekshilik uıymdastyrǵan. Taýdaǵy qardyń kóbi erigenin eskersek, endi jurttyń alańdaýyna esh sebep joq. Jalpy, ýaqtyly qabyldanǵan sharalar arqyly oblystaǵy 22 eldi mekende sý basý qaýpi barynsha tómendetilgen.
Keıingi málimetterge súıensek, Abaı oblysyna qarasty Aıagóz aýdanynda Jetisý qutqarýshylary Borly ózeninde eki traktorshyny izdeý jumystaryn júrgizip jatyr. Bul baǵyttaǵy jumys áli de jalǵasady.
Taǵy bir aıta ketetin jaıt, oblys jáne aýdan ákimdigi men jaýapty departament ókilderi óńirdegi jaǵdaıdy kún saıyn baqylap otyr. Sý basý qaýpi bar 30-ǵa jýyq eldi meken selden saqtandyryldy. Bul qatarda Alakól aýdanyna qarasty Beskól jáne Qabanbaı aýyldyq okrýgteri de bar. Qos aýyldy kishigirim sý basyp, aýyl turǵyndary ábigerge túsken edi. Degenmen der kezinde jergilikti ákimdik pen tótenshe jaǵdaılar bólimi tıisti sharalar qoldandy. Arnaıy sý soratyn tehnıkalarmen sýdy soryp, qum qaptardan bógetter ornatqan. Zardap shekkender bolmady.
«Esik aldyna sý jınala bastaǵanda záre-qutymyz qashty. Eldegi jaǵdaıdy estip, kóńilimiz alaburtyp otyrǵany ras. Ákimdikke birden eskertip, kıim-keshegimizdi de jınap úlgerdik. Áıtkenmen, qutqarýshylar men jergilikti bılik kómekke kelip, syrttan aqqan sýǵa tosqaýyl boldy. Qazir kóńilimiz ornynda. Mal-jan da aman-esen. Balalar mektepke daıyndalyp jatyr», deıdi Qabanbaı aýylynyń turǵyny Anar Iztileý.
Byltyrǵy selden jetisýlyqtar sabaq alǵan sekildi. Qazir qutqarýshylar aýyl-aýyldy aralap, sý kólemin baqylaýda ustap otyr.
Jetisý oblysy