Qaraǵandy aımaǵyna da qarǵyn sýdan qaýip tónip tur. Erigen qar sýynyń kesirinen birneshe baǵyttaǵy jol jabylǵanyna úsh-tórt kún boldy. Birneshe aýylǵa sý bardy. Jergilikti atqarýshy organ, tótenshe jaǵdaılar departamenti men polısııa qyzmetkerleri kúni-túni qam-qareket jasap jatyr.
Sonymen, keıingi derek boıynsha respýblıkalyq mańyzy bar joldyń bir ýchaskesi, oblystyq mańyzy bar joldyń úsh ýchaskesi jáne jergilikti mańyzy bar joldyń bir ýchaskesi áli jabyq tur. Shet aýdanyndaǵy respýblıkalyq mańyzy bar Almaty – Ekaterınbýrg tasjolynyń 1 610 shaqyrymynda qardyń erýi saldarynan joldy sý basty. Eni 90–100 m, tereńdigi 10–20 sm. «QazAvtoJol» AQ tústen keıin Aqsý-Aıýly tasjolyn ýaqytsha ashyp, sol aýmaqtan 270 júk kóligi kolonııasyn shyǵarǵan edi. Alaıda júk kóligi júrgizýshileriniń biri jol qaýipsizdigi erejesin saqtamaı, jol jıegine shyǵyp ketip, aýdarylyp qalǵan. Jumys istep júrgen úsh «KamAZ» da aýdarylyp qalǵan. Abyroı bolǵanda zardap shekkender joq. Júrgizýshiler evakýasııalanyp, ekskavatordyń kómegimen aýdarylǵan júk kólikteri de shyǵaryldy. Aldyńgúni keshkisin bul baǵyttaǵy jol ashyldy.
Shet aýdanynda jergilikti aýqymdaǵy tótenshe jaǵdaı jarııalandy. Qaıraqty, Aqsý, Krasnaıa Polıana, Deripsal eldi mekenderinde 40 úıdi sý basyp, 292 adam evakýasııalandy, onyń 114-i – balalar. Qazirgi ýaqytta barlyq evakýasııalanǵandar qaýipsiz jerlerde, qaýip-qater men sý deńgeıi tómendegen ýaqytta turǵyndardy turǵylyqty jerlerine qaıtarý máselesi qarastyrylady.
Sherýbaı – Nura ózeni de tasyp, onda uzyndyǵy 600 metr ýaqytsha bóget salynyp, qaptar tóselip, tasqynǵa tosqyn qoıylyp jatyr.
Joldardy sý basý jaǵdaıy Ulytaý oblysy baǵytyna qaraıǵy Topar kentinde, Temirtaý – Nura jáne Botaqara kentine qaraı baratyn joldaǵy Petrovka eldi mekeni janynda da oryn aldy. Qarqaraly baǵytynda Botaqara aýly arqyly Pavlodar tasjolynyń boıymen Doskeı, Senokosnoe aýyldary arqyly ótetin aınalma jol bar.
«Aqtoǵaı aýdanyndaǵy Aqtoǵaı – Nurken oblystyq mańyzy bar jol jabyq. Qarqaraly aýdanynyń oblystyq mańyzy bar Egindibulaq – Qoıandy – Búrkitti avtojolynyń 67 shaqyrymynda sý tasyǵan. Shet aýdanynyń Aqoı – S.Seıfýlın – Aqsý-Aıýly – Aqtoǵaı – Balqash» oblystyq mańyzy bar 134 shaqyrymynda qardyń erýinen jol boıynan sý asyp ketti. Eni 200 m, tereńdigi 30 sm. Joldyń bul bóligi jabyq, oblystyq jol arqyly balamaly baǵyt bar. Shet aýdanynyń Nurataldy aýyldyq okrýgindegi Shopa aýlyna kireberis jolynda qar erip, Sherýbaı – Nura ózeni deńgeıiniń kóterilýinen sý tasqyny (eni 300 m, tereńdigi 20 sm) oryn aldy. Shopa aýlyna jol júrý shektelgen», degen habar taratty oblystyq tótenshe jaǵdaılar departamenti.
«Atalǵan tasjoldarda polısııa qyzmetkerlerimen joldardy jabý jáne qaýipsizdikti qamtamasyz etý maqsatynda kúsheıtilgen rejimde jumys atqarylyp jatyr. Jalpy, oblys boıynsha sý tasqyny kezinde jol jabý úshin Polısııa departamentiniń 86 jeke quramy jáne 42 tehnıka jumyldyryldy. Oblys joldarynda shamamen 350 jeńil, 320 júk jáne 26 qoǵamdyq kólik, sondaı-aq 3 myńnan asa júrgizýshimen jolaýshylar qalyp qoıdy. Tótenshe jaǵdaılar departamenti jáne jergilikti atqarýshy bılik ókilderimen qaýiptiń aldyn alý maqsatynda aýqymdy jumys atqarylyp jatyr. Qaraǵandy oblysy turǵyndary men qonaqtaryn qaýipsizdik sharalaryn qatań saqtap, alys joldarǵa shyqpaýǵa shaqyramyz», deıdi oblystyq polısııa departamenti jergilikti polısııa qyzmeti basqarmasynyń ınspektory Dáýlet Qonaqbaev.
Qaraǵandy oblysynyń sý qoımalarynda tasqyn sýdy jınaý jáne ótkizý shtattyq kestege saı ótip jatyr. Sý sharýashylyǵy nysandarynda táýlik boıy kezekshilik uıymdastyryldy. Qajetti arnaıy tehnıkamen jabdyqtalǵan jóndeý brıgadalary bar.
Sý tasqyny kezeńine daıyndyq aıasynda Samarqand sý qoımasynda 73 mln tekshe metr kólemde bos oryn daıyndaldy. Búginde sý qoımasy 83 paıyzǵa toly. Jınalǵan sýdyń jalpy kólemi 212 mln tekshe metr. Bos kólem 43 mln tekshe metr. Yntymaq sý qoımasynda 68 mln tekshe metr bos oryn daıyndaldy. Búginde sý qoımasynda 51 paıyz bos oryn bar. Jınalǵan sýdyń jalpy kólemi 53 mln tekshe metr. Sý qoımasy qosymsha 56 mln tekshe metr sý qabyldaı alady. Jazǵy-kúzgi kezeńde sý toraptarynyń metall bekitpelerinde júk kóterý mehanızmderin tekserý arqyly reglamenttik jumystar júrgizildi.
Keshe Nura aýdany Nura aýly Qundyzdy ózeniniń úsh ýchaskesinde 8 myń sharshy metr bolatyn aýmaqta muz jarý jumystary júrgizildi. Muz usaqtaý jumystary Osakarov aýdanynyń Nıkolaev aýlyndaǵy Sabyrqoja ózeninde jalǵasyp jatyr.
Sý tasqyny jaǵdaıy qatań baqylaýda. Oblysta jedel shtab sý tasqyny jaǵdaıyn táýlik boıy qadaǵalap otyr. Barlyq qyzmet kúsheıtilgen jumys rejimine aýystyryldy.
Qaraǵandy oblysy