Respýblıkalyq «Jas tilshiler» forýmyn ótkizýdi dástúrli is-sharaǵa aınaldyrǵan Ál-Farabı atyndaǵy Qazaq ulttyq ýnıversıtetine bıyl da elimizdiń túpkir-túpkirinen 60-tan astam talapker jınaldy.
Bolashaq jýrnalısterdiń shyǵarmashylyǵyn shyńdap, joldama beretin «Jas tilshiler» forýmynyń shejiresi tereńde jatyr. Alǵash respýblıkalyq «Jas tilshiler» sleti 1975 jyly mamyr aıynda ótken. Onyń bastaýynda O.Súleımenov, F.Ońǵarsynova, D.Stambekov, Sh.Smahanuly syndy tanymal aqyn-jazýshylar turǵany belgili.
Keıingi jıyrma jylda jańa formatta, zamanaýı úlgide ótip júrgen forým bıyl da bolashaq jýrnalıster úshin jańa baǵdarlamalarymen erekshelendi. Forýmnyń ashylýynda jýrnalıstıka fakýlteti Baspasóz jáne elektrondy BAQ kafedrasynyń meńgerýshisi, professor Gúlmıra Sultanbaeva men aǵa oqytýshy Serik Jumabekuly qoǵamdaǵy jýrnalıstiń róline toqtaldy.
«Jas tilshiler» forýmy barysynda gazet tilshisiniń jumysy týraly belgili qalamger-jýrnalıst Júsipbek Qorǵasbek, televızııadaǵy qyr-syryna Jańylhan Asylbekova, jýrnalıstıka negizderi boıynsha Berikbol Tólegen sheberlik synyptaryn ótkizdi.
Forým sońynda eń úzdik shyǵarmashylyq jumystar marapattaldy. «Eń úzdik jas tilshi-2024» baıqaýynyń qorytyndysy boıynsha bas júldege «Ulan» gazetiniń jas tilshisi, Semeı qalasyndaǵy №11 mekteptiń oqýshysy Dıana Aǵzamovanyń jumysy laıyq dep tanyldy. Forým sońynda Ál-Farabı atyndaǵy QazUÝ jýrnalıstıka fakýlteti jeńimpazdarǵa syılyqtar tapsyryp, dıplomdarmen marapattady.
ALMATY