Maıqaıyń kenishinde qulaǵan avtobýsta qalǵan eki adamnyń týystary kómek surap, Astanaǵa bardy. Apattyń bolǵanyna úsh aıǵa jýyqtasa da, qutqarýshy men avtobýs júrgizýshisiniń máıiti áli tabylǵan joq, dep habarlaıdy Egemen.kz.
Al izdeý jumystary toqtap tur. Marqumnyń jaqyndary qutqarý jumystaryn jalǵastyrýdy talap etip jatyr. Olar Pavlodar oblysynyń ákimdigi men jergilikti prokýratýradan kúder úzip, endi iske Prezıdenttiń aralasýyn surap otyr.
KTK telearnasynyń málimetinshe, qutqarýshy Aıdos Sháımerdenniń áıeli Astanaǵa shıetteı bala-shaǵasyn ertip kelgen. "Asyraýshymnan aıyryldym, bes balamdy endi kim asyraıdy?" dep otyr. "Jubaıymnyń máıitin taýyp berse, ǵurypqa saı jerlesek" deıdi.
Nursulý Sháımerden Pavlodarda izdeý jumystaryn jalǵastyrýdy surap, ákimdik pen prokýratýranyń tabaldyryǵyn tozdyrǵan. Esh shara qalmaǵan soń, Úkimetten, Bas prokýratýradan kómek surap otyr.
- Bizdi estıtin pende joq. Kishkentaı balalarymdy alyp, Astananyń tórine kelip otyrmyn, "Alyp berse eken, shyǵaryp berse eken" deımin. Tiri emes ekenine kóndik qoı, tiri deıin desem – úıde joq, óli deıin desem – beıit basy joq, - deıdi qutqarýshynyń áıeli Nursulý Sháımerden.
Topyraq astynda qalǵan eki adam áli kúnge deıin apattan qutqarý qyzmetiniń jumysshylary retinde eseptelip, olarǵa aı saıyn jalaqy tólenip otyr eken. Máıit tabylmaǵandyqtan, qaıtys bolǵany týraly kýálik te joq. Sol sebepti eki otbasyǵa ótemaqy tólenbegen, asyraýshysynan aıyrylǵanyn otbasy retinde járdemaqy da ala almaıdy. Avtobýs júrgizýshisi Aıyp Tileýbergenovtiń jaqyndary istiń sozylyp ketkenine narazy.
- Tórt kisiniń ólimine kombınat jaýap bergisi kelmeı, aǵamyzdyń jumys orny, qutqarýshylarmen sottasaıyn dep jatyr, solardy kináli qylǵysy kelip jatyr. Jer solardiki, oıylyp ketken jer solardyń qatelikterinen, salǵyrttyǵynan boldy, ony moıyndaǵysy kelip turǵan joq. "Bizdiń kinámiz joq" deıdi, - deıdi avtobýs júrgizýshisiniń týysy Amangeldi Tileýbergenov.
Tótenshe jaǵdaılar mınıstrligi de izdeý jumystary qashan jalǵasatynyn aıta almaı otyr. Qazba jumysynyń toqtaǵanyna bir aı ótse de, saraptama jasalmaǵan.
- Eki jaq saraptama júrgizip, qutqarýshylar úshin qazba jumystary qanshalyqty qaýipsiz ekenin týraly sheshim qabyldaýǵa tıis. Sarapshylar qaýip joq dep sheshse, árıne, izdeý jumystary qaıta jandanady, - deıdi Tótenshe jaǵdaılar vıse-mınıstri Baýyrjan Syzdyqov.
Indýstrııa mınıstri ken ornynda óndiristik qaýipsizdikke qarjy az bólinetinin moıyndady. "Bul jaǵdaıdy Pavlodar ákimimen talqyladyq, ınvestorǵa qatysty naqty sheshimder qabyldaımyz" dedi Sharlapaev.
- Buǵan deıin istegenimizdeı, aksıonermen tikeleı dıalog qurmaqpyz. Ol kenishtegi óndiristik qaýipsizdik pen ken ornyn ıgerýdi óz moınyna alady nemese naqty osy ınvestordyń jer qoınaýyn paıdalaný quqyǵy máselesin qaıta qaraıtyn bolamyz. Bir sheshimge kelemiz, - dedi Indýstrııa jáne ınfraqurylymdyq damý mınıstri Qanat Sharlapaev.