Shelek jurtyn shattyqqa bólegen keshen

Alystan menmun­da­laıtyn jańa keshen grek-rım kúresinen álem chempıony, qazaqtyń tuńǵysh Olımpıada chempıony Jaqsylyq Úshkempirovtiń esimimen atalady. Eki jyl buryn qurylysy bastalǵan nysanǵa 2 534,8 mlrd teńge jumsalǵan.

Eńseli etip salynǵan ǵıma­rattyń oıyn, jattyǵý zaldarynda boks, erkin kúres, qazaqsha kúres, grek-rım kúresi, voleıbol, basketbol, fýtbol, fýtzal, gandbol sekildi sport túr­lerinen úıir­meler jumys isteıdi. Ny­sannyń jalpy aýmaǵy – 5 477,4 sharshy metr. Munda She­lek aýlynyń turǵyndary ǵana emes, kórshiles aýyldardan sportqa qyzyǵýshylyq tanytqan balalardyń da jattyǵýyna múm­kindik bar. Kúnine júzdegen jasóspirim men jastar joǵaryda atal­ǵan úıirmelerge qatysyp, sheberlikterin shyńdaıdy.

Aıtýly merekede keshen oblys tarıhyndaǵy asa ma­ńyzdy oqıǵa ekeni ataldy. Bul qadam aýyldyń áleýmettik ın­fraqurylymyn damytýǵa, turǵyndardyń jaǵdaıyn jaq­sartýǵa zor múmkindik beredi.

– Sizderdi birneshe zaly men fýtbol alańy bar zamanaýı dene shynyqtyrý-saýyqtyrý kesheniniń ashylýymen shyn júrekten quttyqtaımyn. Bul ǵımarat tek osy Shelek aýlynda ǵana emes, aýdanda sporttyń damýyna jańa serpin beredi. Sebebi onyń negizinde Eńbekshiqazaq aýdanynyń №3 balalar men jas­óspirimder sport mektebi qurylyp otyr. Mundaı qadam aýdannyń ishinde sporttyq báse­keni arttyrýmen qatar, shyn myqtylardyń iriktelýine múm­kindik týǵyzady dep oılaımyn, – dedi Almaty oblysynyń ákimi Marat Sultanǵazıev.

Sonymen qatar óńir basshy­sy keshenge Qazaqstannyń Eńbek Eri Jaqsylyq Úsh­kem­pirovtiń esiminiń berilýi erekshe ja­ýap­kershilik júkteıtinin atap ótti.

– Jańa sport ǵımaratyn qol­danysqa berý arqyly jas býynnyń, ásirese aýyl jasta­rynyń sportpen shuǵyldanýyna tıisti jaǵdaı jasalyp jatyr. Bul baǵytta basty kóńil aýyl­dyq jerlerge bólinedi, – dedi M.Sultanǵazıev.

Osy oraıda óńirde boı kóterip, paıdalanýǵa berilgen 1 800-den asa sporttyq ǵımarattyń jar­tysynan kóbi aýyldarǵa tıesili ekenin atap ótken jón. Eli­mizdiń dańqyn as­pan­datar jas jetkinshekterge esigin aıqara ashqan sport kesheninde áli talaı respýblıkalyq, oblystyq baıraqty básekelerdiń jalaýy jelbireıdi.

Sondaı-aq osy kúni óńir basshysy aýdan­nyń «Tulpar» JShS-nyń júrgi­zýshilerine 10 jańa avtobýstyń kiltin salta­natty túr­de tabystady. Endigi kezekte She­lek aý­ly men ma­ńaıdaǵy eldi meken­derge sý jańa qoǵamdyq kólikter qa­tynaıdy. Avto­býs­tarda jolaý­shylarmen birge, múm­kindigi shekteýli azamattarǵa da qolaıly jaǵdaı qarastyrylǵan. Ákimniń aıtýynsha, bul qo­ǵamdyq kólikterdegi jolaýshylar men tasymaldaýshylardyń mádenıettin qalyptastyrýǵa yqpal etpek. Salony keń ári jaıly avtobýs­tar bir mezette 30 adamdy tasymaldaı alady. Jańa avtobýstar jyldamdyq shekteý, qozǵalys ıntervalyn ba­qylaýǵa arnalǵan GPS júıesimen jabdyqtalady.

Almaty oblysy