Qarǵyn sý shaıyp, úı-jaı, mal-múlkinen qasqaǵym sátte aıyrylǵan aǵaıyndarǵa kómek qolyn sozýǵa óńir azamattary belsene kirisip ketti. «Amanat» partııasynyń músheleri sý tasqynynan zardap shekkenderge gýmanıtarlyq kómek jınaýda kósh basynan kórinip, 1 myńnan asa aıaqkıim jóneltti.
«Birneshe óńirdi sý alyp jatqany barshamyzdyń qabyrǵamyzdy qaıystyryp otyr. Elimiz úshin, halqymyz úshin qoldan kelgen kómekti aıanyp qalmaımyz. Zardap shekken aımaqtardaǵy áriptesterimizben habarlasyp, qandaı qajetti qural-jabdyqtar kerek ekenin surap, bilgen edik. Olardyń birinshi suranysy – rezeńke aıaqkıim boldy. Sebebi azyq-túlik, gıgıenalyq zattar jetkilikti bolǵanmen, laıǵa, sýǵa kıetin rezeńke aıaqkıimder tapshy kórinedi. Osyny eskere otyryp, «Kúshimiz – birlikte» aksııasy aıasynda partııalastar men depýtattyq fraksııa músheleri 1 myńnan asa rezeńke etik satyp alyp, alǵashqy kómek legin jiberdi. Bastamaǵa barlyq aýdan men qaladaǵy partııalastarymyz tolyqtaı atsalysty. Bul is-shara odan ári de jalǵasyn tabady», deıdi «AMANAT» partııasy Almaty oblystyq fılıalynyń tóraǵasy Qýat Baıǵodjaev.
Aıta ketý kerek, tabıǵı apat aımaǵyndaǵy turǵyndarǵa kómek qolyn sozamyn degen volonterler men oblys turǵyndary úshin «Alataý jastary» KMM oblystyq volonterlik shtaby saǵat 09.00-den 18.30-ǵa deıin jumys istep tur. Osy ýaqyt aralyǵynda óńir turǵyndary halyqqa qajetti zattardy alyp kelip, Qonaev qalasyndaǵy Sentralnaıa kóshesindegi 19-úıde ornalasqan qabyldaý pýnktine ótkize alatyny da habarlandy.
Almaty oblysy