Oblysta qarǵyn sýdyń legi birtindep soltústik bólikke qaraı jyljyp barady. Negizgi qaýip qazirgi kúni Aqtoǵaı, Ýspen, Ertis, Sharbaqty, Tereńkól, Jelezın aýdandarynda saqtalyp otyr.
Aqtoǵaı aýdanynda kúrdeli jaǵdaı qalyptasqan. Osy aptanyń basynda Jalaýly aýlynda jergilikti aýqymdaǵy tabıǵı sıpattaǵy tótenshe jaǵdaı jarııalandy. Munda 14 úıdi topan sý basyp qaldy. Jalaýly aýly oıpań jerde ornalasqandyqtan, jaǵdaı kúrdeli bolyp tur. Sý ortasynda qalǵan baspanalardyń turǵyndaryna jergilikti bılik hal-qadirinshe kómektesip, olardy ýaqytsha týystarynyń úıine ornalastyrdy. Maldary qurǵaq jerge aıdap shyǵaryldy.
Aýmaqtaǵy Sholaqsor aýly da qaýip kózinde qalǵan bolatyn. Jergilikti atqarýshy organdardyń ókilderi men TJD qyzmetkerleri kúsh biriktirip, aýyldy sý basýdan aman alyp qaldy.
«Sholaqsor aýlynyń aınalasyndaǵy topyraq úıindisi, bóget topyraqpen jáne qum toltyrylǵan qapshyqtarmen nyǵaıtyldy. Aýylǵa kiretin joldyń aınalasy da bıiktetildi. Osylaısha, turǵyn úıler men jergilikti uıymdardy sý basýǵa jol berilmedi. 2 tehnıka jáne 2 júzý quraly jumyldyryldy. Atalǵan eldi mekendegi sý deńgeıiniń ózgerýin TJD-nyń 6 qyzmetkeri baqylap otyr. Barlyq tartylǵan kúsh pen qural qazir Jalaýly aýlyna baǵyttaldy», dep habarlady óńirlik tótenshe jaǵdaılar departamentinen.
Keshegi jaǵdaı boıynsha avtokólik joldarynyń bir bóliginde jáne Pavlodar, Aqtoǵaı, Tereńkól, Ýspen, Ertis, Sharbaqty aýdandary boıynsha jalpy sany 10 ýchaskedegi jaǵdaı baqylaýda turǵany belgili boldy. Oblys boıynsha sý tasqynyna qarsy is-sharalarǵa barlyǵy 435 adam, 145 tehnıka, 47 motopompa, 2 júzý quraly jumyldyrylǵan. О́tken táýlikte 108 876 tekshe metr sý sorylyp, 2 850 qap, 150 tonna ınertti materıal tóseldi.
Bilim berý basqarmasy Aqtoǵaı aýdanyna qarasty Shuǵa, Jalaýly aýyldarynyń oqýshylary tórtinshi toqsandy qashyqtan oqı bastaǵanyn habarlady. Jalpy sany 104 bala onlaın túrde bilim alyp jatyr.
О́ńirlik tótenshe jaǵdaılar departamenti bastyǵynyń orynbasary Oleg Treshevtiń aıtýynsha, qarǵyn sý qazirgi ýaqytta oblystyń ońtústik aımaqtaryna qaraı oıysa túsken. Keıingi kúnderi topyraqtaǵy tońnyń beti jipsip, sý jaqsy sińe bastaǵan. Áıtse de soltústiktegi, Reseımen shekaralas aýyldarǵa qaýip tónýi múmkin. Bul óńirlerde qar áli tolyq erı qoımaǵan. Eldi mekenderden qar shyǵarylyp, aryqtar qazylyp jatyr.
Búginde arnaıy komıssııa barlyq sý basqan úıge keltirilgen zalaldy baǵalaý jumystaryna kiristi. Komıssııa jumysynyń qorytyndysy boıynsha barlyq zardap shekkenderge oblys bıýdjetiniń rezervinen jáne bıýdjetten tys qarajat esebinen kómek kórsetiledi.
Jelezın aýdanyndaǵy Mıhaılovka, Veselaıa rosha aýyldarynda qutqarýshylar qyzyl sýdy aryq qazý arqyly buryp jatyr. Barlyǵy 6 jedel top pen 60-tan asa tehnıka bar.
«Keıingi kúnderi Tereńkól aýdanynyń Tomarly jáne Jelezın aýdanynyń Veselaıa rosha, Mıhaılovka aýyldaryna daladan aqqan sýdyń aǵyny edáýir ósti. Olardy tosqaýyl bógetter jasap, sýdyń aǵysyn burýǵa arnalǵan aryqtardy qazý arqyly toqtatý múmkin boldy. Bul aýyldardaǵy úılerdi sý basý qaýpi joıyldy, biraq jumys táýekelder tolyqtaı joıylǵanǵa deıin jalǵasady», dep atap ótti óńir basshysy Asaıyn Baıhanov.
Pavlodar oblysy