Júzge jýyq aqtaýlyq áskerge shaqyrylýshy UQK Shekara qyzmetiniń Almaty, Mańǵystaý oblystaryndaǵy bólimshelerine attandy. Dástúrge saı áskerge shaqyrylǵan 22 jas jigitti shyǵaryp salý rásimi oblystyq Qorǵanys isteri jónindegi departamenttiń saptyq alańynda ótti.
Saltanatty is-sharaǵa oblys ákiminiń orynbasary Maralbek Seıilov, Aýǵanstandaǵy oblystyq soǵys ardagerleri keńesiniń tóraǵasy Baıram Mamedov, oblystyq tájik-aýǵan shekarasyndaǵy urys qımyldary ardagerleri keńesiniń tóraǵasy Ashat Abdýlın, áskerge shaqyrylýshylardyń týystary men jaqyndary qatysty.
– Búgin sizder óńirimizdegi UQK Shekara qyzmetiniń jaǵalaý kúzetine qyzmet etýge attanyp bara jatyrsyzdar. Sizderge myqty densaýlyq, áskerı qyzmette tabandylyq jáne oqý-jaýyngerlik mindetterdi oryndaýda jetistik tileımin. Otan qorǵaý jolyndaǵy qyzmetterińiz sátti ótsin, – dedi oblystyń Qorǵanys isteri jónindegi departamentiniń basshysy, podpolkovnık Rýslan Baltemirov.
Is-shara barysynda jastarǵa Qarýly kúshterden estelik syılyqtar tapsyryldy. Memlekettik qurylymdar men jurtshylyq jyly lebizderin bildirip, aq jol tiledi.
– Qyzmetterińdi abyroımen atqaryp, aman-esen oralýlaryńa tilektespin. Biz senderdi maqtan tutamyz. Otanymyzdyń naǵyz qorǵaýshysy bolatyndaryńa senimdimiz, – dedi áskerge shaqyrylýshylardyń biriniń anasy Shynar Qııanova.
Kóktemgi áskerge shaqyrý naýqany barysynda Mańǵystaý óńirinen 18-27 jas aralyǵyndaǵy 600-den astam jas jigitti merzimdi áskerı qyzmetke shaqyrý josparlanyp otyrǵanyn aıta ketý kerek. Onyń 250-ge jýyǵy Qarýly kúshter qataryna, 240-tan astam adam Ulttyq ulanǵa jáne 100-den astam áskerge shaqyrylýshy UQK Shekara qyzmetine qyzmet etýge attanbaq.