Elimizde pedagogterdi jumysqa qabyldaý júıesi avtomattandyryldy. Bul týraly Oqý-aǵartý mınıstrligi habarlady.
1 sáýirden bastap Ulttyq bilim berý derekter qorynda pedagogterdi mektepke jumysqa qabyldaý boıynsha jańa modýl iske qosyldy. Bul shara sybaılas jemqorlyqqa qarsy jáne konkýrstyq rásimderdi ashyq ótkizý baǵytynda qabyldanǵan. Sondaı-aq pedagogterdi attestattaýda qujattardy tapsyrý boıynsha da avtomattandyrý engizilip jatyr. Endi pedagogterdiń barlyq málimeti «Pedagog portfolıosy» modýlinde jınaqtalady. Munda pedagog týraly, onyń bilimi, densaýlyq jaǵdaıy, jumys tájirıbesi, quqyq buzýshylyq, attestattaýdan ótý, marapattary jáne tálimgerlik pen sıfrlyq qujattar jóninde elektrondy aqparat saqtalady.
Bul jóninde Oqý-aǵartý mınıstrligine qarasty Sıfrlandyrý departamenti dırektorynyń orynbasary Maıra Maralbaeva: «Ashyqtyq pen eseptiliktiń bolýy sybaılas jemqorlyqqa qarsy kúreste basty ról atqarady. Osy modýlderdi engize otyryp, pedagogterdi jumysqa qabyldaý kezinde qaǵaz júzindegi qujat aınalymyn jáne sybaılas jemqorlyq táýekelderin tolyq joıý josparlanyp otyr. Júıeni iske qosý aldynda basqarma, bólimder men bilim berý uıymdarynyń mamandary úshin oqytý uıymdastyryldy», dedi.
Eske sala keteıik, buǵan deıin bul modýl Shymkent qalasynda, Qaraǵandy oblysynyń Shahtınsk qalasynda synaqtan ótti. Sondaı-aq jumys izdeý jáne qajetti personaldy tańdaý boıynsha elimizdiń basqa óńirlerinde de ashyqtyq ornatý úshin Ulttyq bilim berý derekter qorynyń «Elektrondy eńbek bırjasy» platformasymen ózara ıntegrasııasy josparlanǵan.