Senat tóraǵasy Máýlen Áshimbaev bastaǵan bir top Parlament depýtaty jumys saparymen Vatıkan men Italııa Respýblıkasyna bardy. Sapar aıasynda delegasııa Rım Papasy Fransıskpen kezdesti. Sondaı-aq Vatıkannyń Dinaralyq dıalog jónindegi Dıkasterııasynyń jáne Álemdik jáne dástúrli dinder kóshbasshylary Seziniń uıymdastyrýymen dóńgelek ústel ótti. Qazaqstandyq senatorlar Italııa Respýblıkasy Parlamenti Senatynyń depýtattarymen de kezdesip, parlamentaralyq yntymaqtastyqty nyǵaıtý máselelerin talqylady.
Máýlen Áshimbaev Rım Papasy Fransıskke iltıpat tanytyp, Pontıfıkke aýdıensııa úshin alǵys bildirdi. Sondaı-aq ol eki el arasyndaǵy dostyq qarym-qatynastyń odan ári nyǵaıýyna Qazaqstan Prezıdenti Qasym-Jomart Toqaevtyń bıyl qańtar aıynda Vatıkanǵa jasaǵan resmı sapary aıtarlyqtaı serpin bergenin atap ótti. Senat spıkeri óz sózinde Qasıetti Taqqa Álemdik jáne dástúrli dinder kóshbasshylary sezine jan-jaqty qoldaý kórsetip kele jatqany úshin rızashylyǵyn jetkizdi. Sondaı-aq Rım Papasynyń VII sezge qatysýy jahandyq dinaralyq dıalogti arttyrýǵa jáne halyqaralyq deńgeıde rýhanı dıplomatııany damytýǵa zor yqpalyn tıgizgenin aıtty.
Rım Papasy Fransısk Qasıetti Taq Qazaqstannyń beıbitshilik pen túrli din ókilderi arasyndaǵy yntymaqtastyqty nyǵaıtýǵa arnalǵan bastamasyn qoldaıtynyn atap ótti. Sonymen birge ol Astanada ótken Álemdik jáne dástúrli dinder kóshbasshylarynyń VII sezine qatysqan sátti eske aldy.
«Búgingi kezdesýimiz Astanaǵa saparymdy, sol kezde qatysqan Álemdik jáne dástúrli dinder kóshbasshylarynyń VII sezin eske túsirdi. Sezd din lıderleri dıalog quratyn, sondaı-aq álemdik saıasatkerler men mádenıet jáne medıa ókilderin biriktiretin biregeı alańǵa aınaldy. Bul bastama, shyn máninde, qurmetke laıyq jáne Qazaqstandy kezdesýler eli retinde kórsetedi. Bıyl qańtar aıynda Vatıkanǵa saparmen kelgen Qazaqstan Prezıdentimen kezdestim. Sol kezde qazaq halqyna degen izgi nıetimdi bildirdim. Biz dinder, mádenıetter jáne etnostyq toptar arasyndaǵy úılesimdilikke jetý jolynda bir-birimizdi qoldaýymyz qajet. Qazaqstan – osyndaı jetistikpen maqtana alatyn el», dedi Rım Papasy Fransısk.
Sapar aıasynda ekologııa, jahandyq jylyný jáne qorshaǵan ortany qorǵaý máselelerine arnalǵan dóńgelek ústel uıymdastyryldy. Is-shara barysynda Máýlen Áshimbaev Qazaqstan Prezıdenti jasyl ekonomıkaǵa kóshý máselesine basa mán berip otyrǵanyn aıtty. Soǵan sáıkes ulttyq zańnama, Ornyqty damý salasyndaǵy ulttyq maqsattar men mindetterdiń iske asyrylýyna monıtorıng júrgizý jónindegi Parlamenttik komıssııanyń qyzmeti jáne basqa da baǵyttar aıasynda keshendi jumystar júıeli túrde júrgizilip keledi.
«Álemdik jáne dástúrli dinder kóshbasshylary Sezi qazirgideı ózekti syn-qaterler jaǵdaıynda din kóshbasshylarynyń, saıasatkerlerdiń jáne halyqaralyq uıymdardyń kúsh-jigerin ortaq múddege jumyldyrýdy kózdeıdi. Rýhanı kóshbasshylar jergilikti jerde ǵana emes, halyqaralyq deńgeıde de zor yqpalǵa ıe. Olar birlesip, klımattyń ózgerýi, teńsizdik, ekstremızm sııaqty problemalardy sheshýge, qaqtyǵystar men soǵystardy toqtatýǵa aıtarlyqtaı septigin tıgize alady. Planetamyz ben keler urpaqtyń jarqyn bolashaǵy jolynda judyryqtaı jumylý bizdiń ortaq maqsatymyz ekeni anyq», dedi Qazaqstan Parlamenti Senatynyń tóraǵasy.
Sondaı-aq Máýlen Áshimbaev Italııa Respýblıkasy Parlamenti Senatynyń tóraǵasy Inıasıo La Rýssamen kezdesti. Suhbat kezinde taraptar parlamentaralyq qarym-qatynasty arttyrý máselesine keńirek toqtaldy.
«Italııa – Qazaqstannyń Eýropalyq Odaqtaǵy mańyzdy strategııalyq seriktesteriniń biri. Bizdiń elderimiz arasynda syndarly saıası dıalog qalyptasqan. Jyl basynda Qazaqstan Prezıdenti Qasym-Jomart Toqaevtyń Italııaǵa resmı saparmen kelýi sonyń jarqyn bir kórinisi. Bul sapar eki memlekettiń ekonomıkalyq jáne mádenı-gýmanıtarlyq yntymaqtastyǵyn nyǵaıtýǵa tyń serpin berdi», degen Máýlen Áshimbaev aldaǵy ýaqytta parlamentaralyq baılanysty odan ári nyǵaıtýdyń máni zor ekenin aıtty.
Inıasıo La Rýssa eki eldiń qarym-qatynasyn ári qaraı arttyrýdyń mańyzdy ekenine nazar aýdaryp, Qazaqstanda júrgizilip jatqan demokratııalyq jańǵyrtýlar men reformalarǵa qoldaý bildirdi.
Ekijaqty kezdesý barysynda taraptar saýda-ekonomıkalyq, mádenı-gýmanıtarlyq jáne ınvestısııalyq yntymaqtastyqty keńeıtý máselelerin de talqylady. Odan bólek, eki jaq bilim berý jáne týrızm salasyndaǵy seriktestikti keńeıtý jóninde pikir almasty.