Qazaqstannyń bes oblysynda respýblıkalyq tasjoldardyń jeti ýchaskesin erigen sý basyp qaldy. Sondaı-aq elimizdiń alty oblysynda kólik qozǵalysyna shekteý qoıyldy, dep habarlaıdy Egemen.kz «QazAvtoJol» UK» AQ baspasóz qyzmetine silteme jasap.
«2024 jylǵy 6 sáýirdegi saǵat 08:10-daǵy jaǵdaı boıynsha halyqaralyq jáne respýblıkalyq mańyzy bar avtomobıl joldarynda aýa raıynyń jylynýy men qardyń tez erýi saldarynan 5 oblysta (Aqmola, Atyraý, SQO, Pavlodar, Qostanaı) 7 jol júrý ýchaskesinde jalpy uzyndyǵy 5411 metr bolatyn sý tasqyny oryn aldy», dep habarlady vedomstvodan.
6 oblystaǵy (Aqtóbe, Atyraý, Qostanaı, Pavlodar, Mańǵystaý, SQO) respýblıkalyq mańyzy bar 12 avtomobıl joldarynda (uzyndyǵy 797 km) qozǵalysqa shekteý qoıyldy.
Qazirgi tańda respýblıkalyq joldarda 248 birlik tehnıka men 285 adam jumyldyrylǵan.