Rýdnyı qalasynyń Rechnoı, Iýjnyı kóshelerinen jáne qalaǵa qarasty Persev aýylynan 163 adam qaýipsiz jerge kóshirildi. Turǵyndardyń kóbi qaýiptiń beti qaıtqansha týys-týǵandarynyń úıin panalaı turýdy jón kórgen. 5 adam evakýasııa pýnktine ornalastyryldy, dep habarlaıdy Egemen.kz.
«Qazir qalada 4 evakýasııalyq ortalyq bar. Rýdnyı ındýstrııalyq ýnıversıtetiniń, Taý-ken tehnologııasy jáne áleýmettik-gýmanıtarlyq kolledjderiniń jataqhanalaryndaǵy tósek-oryn sany 169-ǵa deıin kóbeıtildi. Al sý tasqynynan zııan shekken turǵyndardyń dúnıe-múlki «Rýdnyı sý arnasy» seriktestiginiń garajyna kóshiriledi», dep málimdedi qalalyq shtab ókilderi.
Turǵyndardy qaýipsiz jerge kóshirý jáne nysanadaǵy ýchaskelerdi patrýldeý jumystaryna 341 adam jumyldyrylǵan. Olardyń 130-dan astamy – eriktiler jasaǵy. Rezervte taǵy 200 adam tur. Qaýiptiń aldyn alý jumystaryna uzyn-yrǵasy 36 tehnıka tartylǵan.
Qazir qaýipti jerlerge ınertti materıaldar ákelinip, Persev aýyly aınalasyndaǵy dambynyń erneýi bekitilip jatyr.
Sý basý qaýpi bar eldi mekenderdiń 227 bas maly «Poznıakov» sharýa qojalyǵynyń jaıylymyna aıdaldy. Ázirge, sý kirgen úı-jaı, qora-qopsy joq.