Densaýlyq saqtaý mınıstrligi elimizdiń birqatar óńirindegi sý tasqyny jaǵdaıyna baılanysty taǵamnan ýlaný men juqpaly aýrýlardyń aldyn alý maqsatynda turǵyndarǵa keıbir erejelerdi ustanýǵa keńes berdi, dep habarlaıdy Egemen.kz.
DSM taǵamnan ýlaný men juqpaly aýrýlardyń aldyn alý úshin birqatar erejerdi ustanýdy usynady:
Ishý jáne tamaq pisirý úshin tek bótelkedegi nemese qaınatylǵan sýdy paıdalanyńyz;
Sý basý oryndarynda bulaqtardan, qudyqtardan jáne uńǵymalardan sý ishpeńiz;
Sý tasqynyna malynǵan tamaq ónimderin paıdalanbańyz, múmkindiginshe olardy kemirgishter men sý tasqyny úshin qol jetpeıtin jerlerde saqtańyz;
Tamaq isher aldynda, dárethanadan, serýendeýden, tamaq daıyndaýdan keıin qolyńyzdy sabynmen jýyńyz;
Sý tasqynynan keıin barlyq bólmelerdi dezınfeksııalyq eritindilermen óńdeńiz;
Eger juqpaly aýrýlardyń belgileri bolsa (dene temperatýrasynyń joǵarylaýy, júrek aıný, qusý, nájistiń bosaýy, tamaq aýrýy, bórtpe jáne t.b.), bul týraly dereý medısına qyzmetkerine habarlaý qajet.