Májilis spıkeri Erlan Qoshanovtyń tóraǵalyǵymen ótken bıýroda aldaǵy jalpy otyrystyń kún tártibi naqtylandy.
Depýtattardyń talqylaýyna «Jol júrisi týraly» zań jobasy men Ákimshilik quqyq buzýshylyq týraly kodekske jekelegen kólik quraldarynyń túrleriniń qozǵalysyn uıymdastyrý jáne jol qozǵalysy qaýipsizdigin sıfrlandyrý máseleleri boıynsha engiziletin ózgeristerdi birinshi oqylymda qaraý usynyldy.
Parlament depýtattary bastamashylyq jasaǵan túzetýler shaǵyn elektr jáne kólik quraldarynyń jekelegen túrleriniń qozǵalysyn baqylaýdy júzege asyrý jáne jol qaýipsizdigin sıfrlandyrý máselelerin qamtıdy. Qozǵaltqysh kólemi 50 tekshe sm-den kem mopedterdi memlekettik tirkeý kózdeledi, sondaı-aq olardyń júrgizýshilerine qoıylatyn talaptar belgilenedi. Jergilikti atqarýshy organdarǵa elektr skýterlerin paıdalaný tártibin aıqyndaý boıynsha quzyret beriledi. Jol qozǵalysy qaýipsizdigin sıfrlandyrý aıasynda sertıfıkattalǵan arnaıy baqylaý-ólsheý quraldary men aspaptaryn paıdalaný tájirıbesi keńeıtiledi.
Aldaǵy jalpy otyrysta Qazaqstan men Qyrǵyz úkimetteri arasyndaǵy «Qarasý» jáne «Aqtilek» avtojol ótkizý pýnktteri aýdanyndaǵy ındýstrııalyq saýda-logıstıkalyq keshenniń qyzmetin qurý jáne retteý týraly kelisimdi ratıfıkasııalaý týraly zań jobasy qaralatyn bolady.
Sondaı-aq Májilis komıtetteri «Nysanaly kapıtal qorlary (endaýment-qorlar) týraly» jáne «Bıologııalyq materıalmen almasý týraly kelisimdi ratıfıkasııalaý týraly» jańa zań jobalaryn jumysqa alady.