«Serik Baıhonov qaıtys boldy!» degen sýyq habar tańerteńnen mıymda shyńyldap tur... Eń alǵash 1971 jyly:
«Serik degen – jaı ǵana laqap atym,
Halyq – meniń shyn atym, mahabbatym!» dep, ór minezdi óleńimen kelip tanysyp edi. Sodan birer jyldan keıin «Jalǵasym meniń – jalǵasym meniń» degen tyrnaqaldy tamasha povesimen jarq etip, proza kóginen kórindi. Ádebıet álemi jalt qarady. Sol kezde:
«О́leńdi Baıbota ekeýińe berdim, men endi qarasózben bolamyn!», dedi. Aıtqanynda turdy.
Serik Baıhonov sodan bergi jarty ǵasyr boıy kesek-kesek shyǵarmalarymen qazaq ádebıetiniń bıiginen túsken joq. Qara sózdiń jiligin shaǵyp, maıyn ishken sheberine aınaldy. Kóp jyldaryn televıdenıege sarp etip, saıahatshylyq jolyn tańdap, Aral taǵdyry, Syr boıy máseleleri týraly soqtaly habarlar túsirip qaldyrdy.
«Qalamgerligińmen qalyń qazaǵyńdy moıyndattyń, endi kınoakter retinde bir jarq etseńshi!», deıtinmin keıde kezdeskende. Túr-tulǵasy, syr-symbaty Gollıvýd akterlerin eske salatyn kórikti azamat edi.
Juptary jazylmaǵan kýrstasy Ǵabıden Qulahmetti aýzynan tastamaıtyn, Baıbota aqynǵa degen qurmeti erekshe bolatyn. Ekeýmizdiń О́skemennen kele jatyp, Ǵabıdenmen kezdesemiz dep, onyń týǵan Sholpan aýlyna burylyp, qonyp qalǵanymyz bar. Túnimen uıyqtamaı, aýyl adamdarymen áńgime-dúken qurǵan. Ol sondaı sapardyń bárinde keleshek shyǵarmalaryna negiz salyp júretin izdengishtigin ańǵardym. Katonqaraǵaıda ýaqyt bólip, kerjaqtyń táýip kempirin at arytyp izdep baryp, Altaıdyń emdik shópteri men tamyrlary týraly táptishtep surap, tizbelep, muqııat jazyp alǵanyna kýá boldym. Keıin sonyń bári saıahatshy Prjevalskıı men onyń sonaý Tıbetke deıingi qıyn-qystaý saparlarynda jolbasshy bolǵan zaısandyq qazaq batyry Myrzash Aldııaruly týraly romanyn jazǵanda paıdaǵa asty.
Biz búgin ár shyǵarmasyn ábden shıratyp jazatyn asa daryndy qalamdas qatarlasymyzdan qapyda aıyryldyq. Orny tolmas qaza. Jazmyshtan – ozmysh joq.
Otbasyna, uly Jalǵas bastaǵan balalaryna, týǵan-týystaryna, qalyń oqyrmandaryna kóńil aıtamyn. Aldyńnan jarylqasyn, qalamdas dos! Nuryń peıishte shalqysyn!
Ulyqbek ESDÁÝLET,
Memlekettik syılyqtyń laýreaty, aqyn