Syr óńirinde jarııalanǵan «Rýhanııat jyly» aıasynda oblystyq fılarmonııa janynan «Jyraýlar úıi» ashyldy. Baǵzy ónerdiń baıraǵyn bıiktetken óńirdegi sharaǵa babadan qalǵan jádiger jyrdy qurmet tutatyn qaýym qatysty.
Oblystyq máslıhat tóraǵasy, «Amanat» partııasy oblystyq fılıalynyń jetekshisi Naýryzbaı Baıqadamov búginde ulttyq mádenıettiń osyndaı ereksheligimen ǵana daralana alatynymyzdy atap ótti.
«Oblys aýdandary men Qyzylorda qalasynda 50-ge jýyq jyr-terme, 14 qobyz úıirmesi jumys isteıdi. Osy úıirmelerde 400-den asa jas dástúrli óner soqpaǵyn jalǵamaqqa talap qylyp júr. Búgin jumysyn bastaıtyn «Jyraýlar úıi» osyndaı ortalyqtar basyn qosyp, babalardan qalǵan amanat ónerdiń órisin keńeıtip, nasıhatyn arttyratyn birden-bir rýhanı oryn bolady dep senemiz», dedi ol.
Jyraý, Qazaqstannyń eńbek sińirgen qaıratkeri Almas Almatov dástúrli óner ókilderi ǵasyrlardan beri jaqsylyqqa jarshy atanyp, eldi bolashaqqa bastaıtyn aǵartýshy tulǵa bolǵandyǵyna toqtaldy. Osynyń arqasynda myńjyldyq mádenıettiń izi óshpeı, búginge jetip otyr. Búgingideı qoldaý, qurmettiń arqasynda alǵa qadam basyp, ultpen birge jasaı beredi.
«Syr súleıleriniń sonaý elýinshi jyldardan beri qaraı jınaqtalǵan murasyn toptastyrsaq, jyraýlyq dástúrdiń jalpy adamzat órkenıetine qosqan úlesi men áseri aıqyndala túser edi. Al osy telegeı-teńiz mol óner murager urpaqtary arqyly dástúrlik sıpatqa ıe bolady. Toqsanynshy jyldardan beri qaraı qolǵa alynǵan sharalar arqasynda talaı jas búginde qoǵamdaǵy saıası-áleýmettik máselelerdi bezbendep, halyqqa jón aıta alatyn rýhanı-aǵartýshy deńgeıine kóterildi. Olardyń izin basqan talaptylar da barshylyq. Búgingi ortalyq osy baǵyttaǵy jumystardy júıelep, bolashaq urpaqtyń ómirsheń talabyna saı bolady dep oılaımyz», dedi Almas Nurmahanuly.
Shara qonaqtary arasynda folklortanýshy ǵalym, epıkalyq jyrshylyq, oryndaýshylyq úrdistiń kórnekti ókili, jyrshy Berik Júsipov, dástúrli ánshi, Súıinbaı, Jambyl dástúrin jalǵastyrýshy Aqan Ábdýalıev, jyrshy Amandyq Kómekov boldy.
О́ner ordasyna engennen-aq túrki halyqtarynyń uly oıshyly, jyraý, kúı atasy Qorqyt baba, Jankent, Saýran, Shirik-rabat syndy kóne qalalar sýrettelgen kompozısııaǵa aıaldaısyz. Al aqparattyq taqtada jádiger ónerdiń burynǵysy men búgingisinen habar beretin málimetter toptastyrylǵan. Ár aýdandaǵy úıirmelerge qatysty aqparat ta osynda saqtalady. О́ner ıeleri týraly derekter, tipti keıbiriniń daýsy da saqtalǵan.
Jyraýlar úıindegi kórermender zalynyń sahnasy ulttyq naqyshta bezendirilgen. Sahna aınasynda ornatylǵan zamanaýı materıaldan jasalǵan jartylaı kıiz úı tárizdi qurylǵynyń tóbesin shańyraq túıistiredi. Bul konserttik zal televızııalyq túsirilimder jasaıtyn stýdııa da bolady. Ekspozısııalyq mýzeı zaly da biraz qundy dúnıeni toptastyryp tur. Qorqyt baba muragerleri – Nyshan, Nurǵalı baqsylar qobyzdarynyń sýretteri, jyraýlyq úsh mektep bastaýyndaǵy Nurtýǵan, Jıenbaı, Nartaıdyń beıneleri, tutynǵan quraldary men jetken jetistikteriniń qujattary qoıylǵan. Mýzeı zalynan Syr elinde 2006 jyldan bastap dástúrli túrde uıymdastyrylyp kele jatqan túrki tildes elderdiń halyqaralyq «Qorqyt jáne Uly dala sazy» folklorlyq-mýzykalyq óner festıvaliniń keıbir sátterin, baǵzy ónerge qatysty baǵaly zattardy kóre alasyz.
Jyraýlar úıiniń alqaly alańynda Syr súleıleriniń izbasarlary, jyrshy-jyraýlar óner kórsetip, jyrdan shashý shashty.
Qyzylorda