Almaty polısııasy ekinshi deńgeıli bank qyzmetkerin aldaǵan kúdiktilerdi ustady, dep habarlaıdy Egemen.kz Polisia.kz saıtyna silteme jasap.
«Onyń messendjerine quqyq qorǵaý organdarynyń ókilderi tarapynan bank pen onyń qyzmetkerlerine qatysty tekserý júrgizilip jatqany týraly jáne ol olardyń naqty nusqaýlaryn oryndaýy kerek degen habarlamalar kele bastaǵan. Keıinirek olar kıbershabýyl bolǵanyn jáne alaıaqtyq áreketterdiń aldyn alý úshin barlyq qoldanystaǵy shottan aqshany alyp, sodan keıin senimdi adamdarǵa aýdarý qajettigin habarlaǵan. Osy nusqaýlardy oryndaǵan áıel shotynan 4 mıllıon teńge jáne 10 myń dollardy sheship alǵan. Ol aqshany kýrerge berip jibergen», dedi Almaty qalalyq polısııa departamenti bastyǵynyń orynbasary Qýatbek Naýatov.
Alaıaqtarǵa aldanǵanyn uqqan áıel polısııadan kómek suraǵan. Kýrer dereý ustaldy. 19 jastaǵy jasóspirim atalǵan árekettiń qylmystyq sıpatyn biletinin moıyndady, jumys berýshiler oǵan jábirlenýshilerden alǵan somadan 1 paıyz syıaqy berip otyrǵan.
«Kýrer aqshany aýdarǵan shottardy anyqtadyq. Olardyń izi shetelde tabyldy. Aıtpaqshy, qylmystyq jolmen alynǵan qarajatty aýdarýǵa qatysqan úsh adam ustaldy. Kúdiktiler qamaýǵa alyndy», dedi Q.Naýatov.
QR QK-niń 201-babyna sáıkes ózge aqparat tergeý múddesine oraı jarııa etilmeıdi.