Elordada ınklıýzıvti bilim resýrstyq ortalyǵy ashyldy. Bul mektep muǵalimderiniń jumysyn súıemeldeýge baǵyttalǵan alǵashqy qalalyq ortalyq bolyp tur. Bir ereksheligi, ortalyqtyń ashylýyna bıznes qaýymdastyqtyń qoldaýy muryndyq bolǵan.
Elordada qalalyq ınklıýzıvti bilim resýrstyq ortalyǵynyń ashylý saltanaty ótti. Jańa ortalyq astanalyq J.Táshenov atyndaǵy №10 mekteptiń bazasynda ashyldy, atalǵan oqý oshaǵynda kórý qabileti tómen 168 oqýshy, onyń ishinde 28 kórý qabiletinen aıyrylǵan bala oqıdy. Resýrstyq ortalyq elordanyń basqa mektepterine erekshe qajettilikteri bar balalardy bilim úderisine qosý boıynsha osy mekteptiń tájirıbesin bólisý maqsatynda ashyldy.
Resýrstyq ortalyqtyń mamandary elordanyń jalpy bilim beretin mektepterine konsýltatıvtik jáne ádistemelik kómek kórsetedi. Tıflopedagog, logoped, psıholog jáne defektolog sııaqty arnaıy pedagogter praktıkalyq semınarlar men konsýltasııalar uıymdastyrady, sondaı-aq mektep pedagogterine aqparattyq materıaldar daıyndaıdy.
«2015 jyldan bastap biz erekshe balalarmen jumys jasaýda úlken tájirıbe jınaqtadyq, endi basqa mektepterdiń pedagogterimen bólisýge daıynbyz. Bilim alýda erekshe qajettilikteri bar oqýshylarymyzdyń 16% ǵana mekteptiń janynda turady. Qalǵandary da úılerine jaqyn mektepterde bilim alsa, bul erekshe balasy bar otbasyna yńǵaıly», dedi № 10 mektep-gımnazııasynyń tıflopedagogi Sáýle Saǵymbaeva.
Ortalyqty «Dara» qaıyrymdylyq qory «MARS» kompanııasynyń qoldaýymen ashty. Kompanııanyń kómegimen resýrstyq ortalyq qajetti tıflotehnıkamen, arnaıy jıhazben, sondaı-aq balalarmen jumys isteýge arnalǵan damytýshy jáne ádistemelik materıaldarmen jabdyqtalǵan.
Ortalyq Eýrazııa, Belarýs jáne Túrkııadaǵy «MARS» kompanııasynyń bas menedjeri Arman Sútbaev: «Inklıýzııa taqyryby – bizdiń qoǵam aldynda turǵan úlken jáne mańyzdy másele. «MARS» kompanııasynda biz ár adam biregeı jáne daryndy dep sanaımyz jáne erteń kórgimiz keletin álem búgingi isterimizden bastalatynyna senemiz. «Dara» qaıyrymdylyq qorymen yntymaqtastyqtyń nátıjesinde biz balalarǵa laıyqty bilim alýǵa kómektesip jatqanymyzǵa qýanyshtymyn», dedi.
Aıta keteıik, ótken jyly Astanada 610 nashar kóretin jáne 27 kórý qabiletinen aıyrylǵan, sonyń ishinde 419-y mektep jasyndaǵy balanyń ata-anasy arnaıy mamandandyrylǵan qyzmetke júgindi.