Úkimette sý tasqyny jaǵdaıyna baılanysty evakýasııalyq ortalyqtarǵa ornalastyrylǵan balalarmen jumys isteý algorıtmi jasaldy. Premer-mınıstr Oljas Bektenovtiń tóraǵalyǵymen ótken sý tasqyny saldaryn joıý sharalary boıynsha keńeste vıse-premer Tamara Dúısenova bul mehanızmder týraly tolyǵyraq aıtyp berdi.
Qazir 115 oqýshy bilim alatyn 130 mektepte oqý úderisi qashyqtan júrip jatyr. Evakýasııalyq ortalyqtardaǵy balalar kelesideı bólinýde:
Bastaýysh synyp oqýshylary (1-4 synyptar) (207 bala ata-analarymen birge) oqý úderisin tolyq uıymdastyra otyryp, saýyqtyrý ortalyqtaryna (lagerlerde) ornalastyrylady. 5-8 synyp oqýshylary (1 577 bala) «Daryn», BIL, NZM mektep ınternattaryna ornalastyrylady. Joǵary synyp oqýshylary (9-11 synyptar) (213 bala) kolledjder men joǵary oqý oryndaryna ýaqytsha ornalastyrylady.
Vıse-premer mindet sý tasqyny jáne qalpyna keltirý jumystary aıaqtalǵanǵa deıin balalardy oqýmen jáne jazǵy demalyspen qamtamasyz etý ekenin atap ótti.
«Algorıtm ázirlendi, ony jumaǵa deıin ákimdikterge jetkizemiz. Bul jumysqa kásipodaqtardy, jekemenshik lagerler men mektepterdi, tegin jol júrýdi qamtamasyz etýde QTJ-ny, JOO oqytýshylaryn jáne t.b. qosamyz. Jalpyǵa birdeı bilim berý qory aıasynda balalar barlyq qajetti kerek-jaraqpen qamtamasyz etiletin bolady. Mektep psıhologteriniń jumysy da uıymdastyrylǵan», dedi T.Dúısenova.
Sonymen qatar vıse-premer medısınalyq ónimder men dári-dármek qory týraly baıandady.
Densaýlyq saqtaý salasyndaǵy úsh negizgi mindet boıynsha jumystar júrgizilip jatyr: sanıtarlyq-epıdemıologııalyq brıgadalar jumysy, zardap shekkenderge medısınalyq kómek kórsetý jáne olardy dári-dármekpen qamtamasyz etý.
Atap aıtqanda, sanıtarlyq-epıdemıologııalyq brıgadalar Aýyl sharýashylyǵy mınıstrligi mamandarymen birlese sý sapasyn tekserý jáne ólekse kómilgen jerler, qoqys oryndary jáne septıkterdi baqylaýǵa alý boıynsha jumystar júrgizip jatyr.
Budan bólek, jumys toby ınfeksııalyq jáne bakterıologııalyq aýrýlardyń taralýynyń aldyn alý úshin reseılik áriptesterimen únemi baılanysta. Jumys qorytyndysy boıynsha eskertý sharalary qoldanylady.
Vıse-premerdiń aıtýynsha, barlyq juqpaly aýrý aýrýhanalary men medqyzmetkerler qajet bolǵan jaǵdaıda táýlik boıy jumys isteýge daıyndalyp otyr.
«Algorıtm bar, evakýasııalyq pýnktterde mobıldi toptar jumys istep jatyr. Dıspanserlik esepte turǵandar men júkti áıelder erekshe baqylaýda. Dezınfeksııalyq quraldar men dári-dármektiń 2 aılyq qoryn jasaý mindeti tur», dedi T.Dúısenova.
Qajetti dári-dármek qoryn medısınalyq uıymdardyń bazalarynda jáne SQ «Farmasııa» aımaqtyq qoımalarynda jınaý josparlanǵan. Qazir Densaýlyq saqtaý mınıstrligi óńirlermen tyǵyz baılanysta belsendi jumys jasap jatyr.
Qazaqstan Respýblıkasy Úkimetiniń 2014 jylǵy 19 jeltoqsandaǵy №1358 qaýlysy
Shyǵyndy óteý qaǵıdalary
Algorıtm
Materıaldyq zalal keltirilgen zardap shegýshiler tótenshe jaǵdaı týyndaǵan kúnnen bastap kúntizbelik 30 kún ishinde jergilikti atqarýshy organǵa (ákimdik) materıaldyq zalaldy óteý týraly ótinish beredi.Jábirlenýshiniń óziniń ótinish jazýǵa múmkindigi bolmaǵan jaǵdaıda, onyń týystary nemese senimhat negizinde ózge de adamdar, sondaı-aq eger jábirlenýshi kámelettik jasqa tolmaǵan bolsa, zańdy ókilderi keltirilgen zııandy (zalaldy) óteý týraly ótinishpen júgine alady.
Keltirilgen zalaldy óteý týraly ótinishke: zardap shegýshi adamnyń jeke basyn kýálandyratyn qujattyń kóshirmesi; tabıǵı sıpattaǵy TJ týyndaǵan sátten bastap nemese TJ joıý kezeńinde zardap shekken adamnyń joǵalǵan jáne/nemese búlingen múlkiniń tizbesi qosa beriledi.
О́tinishter men qujattardy tirkeýdi ákimdik zardap shegýshige qujattardyń qabyldanǵanyn rastaıtyn qolhat bere otyryp, materıaldyq zalaldy óteý týraly ótinishterdi tirkeý jýrnalynda júrgizedi. Materıaldyq zalaldy óteý týraly ótinish ákimdikke qujattar kelip túsken kúnnen bastap 15 jumys kúni ishinde qaralady. Ákimdik ótinish tirkelgen kúnnen bastap 10 jumys kúni ishinde baǵalaýshyny tarta otyryp, keltirilgen zalaldyń mólsherin baǵalaýdy (ótinish berýshiniń múlkine qoljetimdilik bolýǵa tıis) uıymdastyrady. Jábirlenýshi baǵalaý júrgiziletin ýaqyt pen oryndy anyqtaıdy, keıin jábirlenýshi baǵalaý týraly eseppen tanysýǵa tıis. Ákimdik baǵalaýshy qorytyndy shyǵarǵannan keıin 3 jumys kúni ishinde oblystyń, respýblıkalyq mańyzy bar qalanyń, astananyń, aýdannyń jáne oblystyq mańyzy bar qalanyń bıýdjetin atqarý jónindegi ýákiletti organmen kelisilgen qarajat bólý týraly sheshim qabyldaıdy. Zardap shekkenderge tólem tıisti sheshim qabyldanǵannan keıin kúntizbelik 30 kún ishinde júzege asyrylady.Múlikti tolyqqandy ári sapaly baǵalaý úshin sarapshylardyń jumysy sý tasqyny jaǵdaıy turaqtalyp, úıler men aýla aýmaqtarynan sý tolyǵymen tartylǵannan keıin bastalady.
Jergilikti atqarýshy organdarǵa qajet bolǵan jaǵdaıda ótinishterdi qabyldaý merzimin uzartý tapsyryldy.