V Dúnıejúzilik kóshpeliler oıyndaryna daıyndyq aıasynda Shymkenttegi ortalyq ıppodromda teńge ilýden II Azııa kýbogi ótti. Baıraqty básekede Qazaqstan, Qyrǵyzstan, О́zbekstan, Reseı, Qytaı, Mońǵolııa, Tájikstannan kelgen sportshylar teńge ilýdiń birneshe stıli boıynsha baq synasty.
Jarystyń ashylý saltanatyna Qazaqstan Ulttyq sport qaýymdastyǵynyń prezıdenti Islambek Saljanov, Teńge ilý federasııasynyń prezıdenti Amangeldi Ábdiqadyrov, Shymkent qalasy ákiminiń orynbasary Sársen Quranbek qatysyp, saıyskerlerge sáttilik tiledi.
«Bıyl qyrkúıek aıynda Astanada Prezıdent bastamasymen V Dúnıejúzilik kóshpeliler oıyndary ótedi. Búgingi Azııa kýbogi – osy tartysty dodanyń aldyndaǵy jaýapty jarystardyń biri. Teńge ilý sportynyń Dúnıejúzilik kóshpeliler oıyndarynyń baǵdarlamasyna enýi, onyń álemdik deńgeıde tanymal bolýyna yqpal etedi», dedi I.Saljanov.
II Azııa kýbogi Teńge ilý federasııasynyń, Ulttyq sport qaýymdastyǵy men qalalyq ákimdiktiń qoldaýymen uıymdastyryldy. Al sporttyq is-sharanyń bas seriktesi – «Samuryq-Qazyna» AQ. Sport Qory sportty qoldaý qory da jarysqa demeýshilik kórsetti.
Azııa kýbogine 7 elden kelgen sportshy qatysty. Bul óz kezeginde teńge ilý sportyna degen qyzyǵýshylyqtyń artyp kele jatqanyn aıǵaqtaıdy. Osy oraıda bıyl halyqaralyq teńge ilý federasııasyn ashý kózdelip otyr. Teńge ilý federasııasynyń prezıdenti A.Ábdiqadyrovtyń aıtýynsha, osy Azııa kýboginde elimizdiń eń úzdik sportshylary synǵa tústi.
«Bul jarysta ulttyq quramamyzdyń sportshylary V Dúnıejúzilik kóshpeliler oıyndary qarsańynda óz daıyndyqtaryn shyńdady. Al shetel-dik quramalar Qazaqstannyń úzdik sportshylarymen tájirıbe almasýǵa múmkindik aldy», dedi ol.
Jarysty barynsha ádil baǵalaýǵa osy joly teńge ilý sportynyń tarıhynda tuńǵysh ret beıne qaıtalaý júıesi qoldanyldy. Sonymen qatar ýaqytty ólsheý úshin arnaıy lazer-sekýndomer paıdalanyldy.
Sonymen, jarys qorytyndysynda Bes beles ádisi boıynsha Ǵalymjan Izjanov 1-oryn, Rahat Qambarov 2-oryn, Qanat Baqtybaı 3-oryndy ıelendi. Atalǵan sportshylardyń barlyǵy da – Túrkistan oblysynyń oǵlandary. Teńge ilýdiń jaı stıli boıynsha Rahat Qambarov 1-oryn, Ǵalymjan Izjanov 2-oryn, Qanat Baqtybaı 3-oryn tuǵyrynan kórindi. Sondaı-aq bul jarysta Qanat Baqtybaı úzdik absolıýtti chempıon atandy.
ShYMKENT