Bul týraly Memleket basshysy Qasym-Jomart Toqaev Ǵylym jáne tehnologııalar jónindegi ulttyq keńestiń otyrysynda aıtty, dep habarlaıdy Egemen.kz Aqordanyń baspasóz qyzmetine silteme jasap.
«Eń aldymen, men elimizdegi qazirgi ahýalǵa toqtalyp ótkim keledi. Jaǵdaıdy kórip, bilip otyrsyzdar, aımaqtarda seksen jyl bolmaǵan joıqyn sý tasqyny bolyp jatyr. Kóptegen eldi mekendi qarǵyn sý basty. Jalpy ahýal óte kúrdeli», dedi el Prezıdenti.
Memleket basshysynyń aıtýynsha, qazir Úkimet barlyq qajetti sharalardy jedel túrde qabyldap jatyr.
«Tıisti tapsyrmalardy berdim, jaǵdaıdy baqylaýda ustap otyrmyz Tabıǵattyń tosyn minezinen basqa da elder zardap shegýde. Álemniń ár túkpirinde jer silkinisi, órt, sý tasqyny bolyp jatyr. Bir sózben, jahandyq klımat ózgerip, tabıǵı apattar jıilep ketti», dedi Qasym-Jomart Toqaev.
1980-1985 jyldary álemde 1700-ge jýyq tabıǵı apat bolǵan. Al 2010-2015 jyldary apattardyń sany 3700-den asqan.
«Iаǵnı az ýaqyttyń ishinde tabıǵı apat sany eki ese kóbeıdi. Jartysyna jýyǵy – sýǵa qatysty apattar. Árıne, bul – búkil adamzatqa tónip turǵan óte úlken qater. Sondyqtan mundaı apattardyń aldyn alyp, azamattardyń amandyǵyn qamtamasyz etý – asa mańyzdy mindet. Ǵylym – bul mindetti iske asyrýdyń birden-bir joly», dedi Prezıdent.
Memleket basshysynyń aıtýynsha, elimizde bolyp jatqan sý tasqyny kezinde bilikti mamandar men ǵalymdardyń tapshylyǵy aıqyn sezildi.
«Men ǵylymdy damytý týraly únemi aıtyp júrmin. Árıne, ǵylymdy bir kúnde nemese bir jylda damytyp jiberý múmkin emes. Uzaq ýaqyt tabandy jumys isteý kerek. О́kinishke qaraı, Qazaqstanda ondaǵan jyl boıy ǵylymǵa jete mán berilgen joq. Shynyn aıtý kerek. Elimizdiń burynǵy ǵylymı áleýeti men ınfraqurylymyn joǵaltyp aldyq. 40 myń ǵalym 90-shy jyldardaǵy qıyn kezeńde ǵylymnan múlde qol úzdi. Keıbir ınstıtýttar saqtalyp qalǵanymen, jalpy ǵylym birtutas júıe retinde qatty álsirep ketti. Osynyń saldary endi kórinip jatyr. Biz elimizdiń ǵylymı áleýetin qalpyna keltirýimiz kerek», dedi ol.