Májilis depýtattary sý tasqynynan zardap shekken aımaqtardaǵy jumysyn jalǵastyryp jatyr. Keıbir eldi mekenderde sý tartylyp jatsa, keıbirinde taǵy da tasqyn sý kele jatyr. Halyqpen kezdesýde depýtattar tabıǵı apattan kelgen shyǵynnyń qalaı qalpyna keltiriletinin túsindirip, aldaǵy sý tasqynyna daıyndyqqa kómektesip jatyr, dep habarlaıdy Egemen.kz Májilistiń baspasóz qyzmetine silteme jasap.
Májilis depýtattary Edil Jańbyrshın, Abzal Quspan, Rınat Zaıtov, Maqsat Tolyqbaı, Nartaı Sársenǵalıev Atyraý oblysyna baryp, bóget soǵylyp jatqan aımaqtardy aralady. Aldymen Sokolok kanaly aýmaǵyndaǵy tasqyn sýdyń aldyn alý boıynsha atqarylyp jatqan jumystarmen tanysty. Bul ýchaskege Atyraý qalasyndaǵy Juldyz yqsham aýdany jáne Aqsaı, Aqjar, Talqaırań, Besikti aýyldarynyń mańaılary kiredi.
Munda uzyndyǵy 15 shaqyrymdy quraıtyn damba salynyp jatyr. Búginde onyń 8 shaqyrymy aıaqtalǵan.
Depýtat Ekaterına Smyshlıaeva Qostanaı oblysy Qarasý aýdanynyń turǵyndaryn evakýasııalaýǵa qatysty. Munda 39 eldi mekenniń 8-in sý basqan. Al Qaramyrza aýylynda 33 aýla men 53 turǵyn úı zaqymdanǵan.
Jergilikti turǵyndarmen kezdesýde májilismen sý tasqynynan zardap shekkender turǵyndarǵaqandaı ótemaqy tólenetinin túsindirdi. Ol úshin arnaıy komıssııa shyǵyndy tolyq esepteıdi. Turǵyn úıleri búlingen azamattardyń tizimin jergilikti ákimdikter jasaıdy.
«Qazir jergilikti atqarýshy organdar qalpyna keltirýge bolatyn úılerdi jóndeý boıynsha jumysqa kirisetinderin aıtty. Al qalpyna keltirýge múmkindik bolmasa, Úkimet málimdegendeı, jańa úıler salynady. Eger ol ýchaskeler sý basyp qalǵan aýmaqtarda bolsa, onda basqa jer beriledi. Bul másele qalaı da sheshiledi», dedi Ekaterına Smyshlıaeva.
Búginde Qostanaı oblysynda sý tasqyny basylyp keledi. О́ńirde Qarasý jáne Qostanaı aýdandarynyń alty eldi mekeninde, sondaı-aq oblys ortalyǵynda 150-den astam jeke turǵyn úı áli de sý basý aýmaǵynda qalyp otyr.
Depýtat Vera Kım Pavlodar oblysyndaǵyjumysyn jalǵastyrýda. Ol Atameken jáneKenjekól aýylyndaǵy bógetterdiń, bekinister men jaǵalaýlardyń tehnıkalyq jaǵdaıymen tanysty.
Munda sý tasqynynyń birinshi kezeńi apatsyz ótti. Ertis ózeniniń boıynda ornalasqan Joǵary Ertis sý qoımalarynan Shyǵys Qazaqstan oblysyna sýdyń ekinshi tolqyny kelýi múmkin.Tasqynnyń aldyn alý úshin jaǵalaýlardy nyǵaıtýǵa topyraq ákelinip jatyr. Atamekenge 2 myń tonna, Kenjekólge 6,5 myń tonna qum jetkizildi.
Tasqyn Aqsý qalasyna da qaýip tóndirip otyr. Qalanyń ońtústik-shyǵys jaǵyna jer ústi bógetteri turǵyzyldy. Sondaı-aq Ertis ózeniniń jaǵalaýynda uzyndyǵy 1020 m, bıiktigi 4,5 m qorǵanys qurylystary salynyp, 3 myń tonnadan astam topyraq jumsaldy.
Sarapshylarmen jáne vedomstvolyq qurylymdardyń ókilderimen áńgimelesýbarysynda Vera Kım eskertý júıelerin tekserý, evakýasııalaý oryndaryn anyqtaý jáne jaǵdaıdy únemi baqylaýda ustaý qajettigine nazar aýdardy. Qazir qutqarýshylar eldi mekenderde táýlik boıy kezekshilik etip, mamandar bekinisterdi tekserip jatyr.