2023 jyly AHAT organdary Qazaqstan Respýblıkasynda 120,8 myń nekeni tirkedi, bul budan burynǵy jylmen salystyrǵanda 5,9% az, dep jazady Egemen.kz.
Nekelesýdiń jalpy koeffısıenti 6,07 qurady (1000 adamǵa shaqqanda). О́ńirler arasynda Astana qalasynyń turǵyndary kóp nekelesken, 1000 adamǵa shaqqandaǵy keffısıent 7,46, al eń tómengi deńgeı Túrkistan oblysynda – 1000 adamǵa 5,55 boldy, dep habarlaıdy inbusiness.kz saıty.
Ulttyq statıstıka málimetinshe, otbasyn qurǵandardyń ishinde birinshi ret nekege turǵan erlerdiń úlesi 78,2%, áıelderde – 79,4%, ajyrasqandar arasynda qaıta nekege turý úlesi erlerde 20,4%, áıelderde 18,9% boldy.
Qalalyq jerlerde 80 myń neke (66,2%), aýyldyq jerlerde 40,8 myń neke (33,8%) tirkeldi.
Alǵash ret nekege turǵandardyń ortasha jasy erler úshin 27,8 jas, áıelder úshin 25,2 jas boldy.
Tirkelgen nekelerdiń 82,3% monoetnıkalyq, ıaǵnı bir ult arasyndaǵy juptardyń otasýy, al qalǵan 17,7% – etnosaralyq.
Ajyrasýǵa keletin bolsaq, olardyń sany 2022 jylmen salystyrǵanda 9,6% azaıyp, 40,2 myńdy qurady. Qalalyq jerlerde 29,4 myń ajyrasý (73,1%), aýyldyq jerlerde 10,8 myń ajyrasý (26,9%) tirkelgen.
Ajyrasýdyń jalpy koeffısıenti 2,02 qurady (1000 adamǵa shaqqanda). Ajyrasýdyń eń joǵary deńgeıi ShQO-da – 1000 adamǵa shaqqandaǵy koeffısıent 3,14, Túrkistan oblysynda eń tómen – 1000 adamǵa 0,89. Osylaısha, 2023 jyly 1000 nekege 333 ajyrasýdan kelgen (2022 j. – 347).
Neke uzaqtyǵy boıynsha ajyrasýlardyń eń kóp úlesi (34,9%) nekede 1-4 jyl ómir súrgen otbasylar arasynda, taǵy 26,7% 5-9 jyl birge otasqandar arasynda bolǵan.