Atyraý oblysynyń Jylyoı aýdanynan evakýasııalanǵan 7 445 adam «Teńiz» ken ornyndaǵy jataqhanalarda turyp jatyr. Onyń ishinde 3 myńnan asa bala bar. Balalardyń kópshiligi – mektep oqýshylary.
«Teńizshevroıl» jáne merdiger kompanııalar jylyoılyq turǵyndarǵa qolaıly jaǵdaı jasady. Al oqýshylardy qashyqtan oqytýdy jalǵastyrý úshin joǵary jyldamdyqty ınternetpen qamtamasyz etip otyr.
Qulsary qalasynyń turǵyny Nazym Qaldybekova 6 sáýirde balalarymen birge «Teńizge» evakýasııalanǵan. Sol kezde balalarynyń sabaǵyna alańdaǵanyn jasyrmaıdy.
«Qazir bul másele retteldi. Endi balalarym tańǵy astan keıin sabaq oqýǵa kirisedi. Jyldamdyǵy joǵary ınternet bar. Balalar oqý baǵdarlamasyn tolyq meńgerý úshin kez kelgen saıtty paıdalana alady», deıdi N.Qaldybekova.
Kópbalaly ananyń biri Qyrmyzy Jumaǵalı ken ornyndaǵy jataqhanaǵa 7 sáýirde kelgen. Bes balasynyń úsheýi onlaın bilim alýǵa kiristi.
«Balalardyń onlaın dáris alýyna barlyq jaǵdaı jasalyp otyr. Sabaqqa qajetti keńse taýarlarymen qamtamasyz etildi. Ústelder balalardyń sabaq oqýyna yńǵaıly etip jabdyqtalǵan. Bul – balalarǵa qıyn jaǵdaılarǵa qaramastan oqýyn jalǵastyrýyna múmkindik beretin mańyzdy qadam», deıdi Q.Jumaǵalı.
Al 6-synyp oqýshysy Káýsar Qydyrǵalı Qulsary qalasyndaǵy Iý.Gagarın atyndaǵy orta mektepte oqyǵan. Qazir ken ornyna kelgendikten, synyptastaryn saǵynyp júr eken.
«Sabaqty onlaın oqysaq ta ózimdi mekteptegideı sezinemin. Ken orny unady. Ashanadaǵy taǵamdar da dámdi eken. Dostarymyzdyń keıbirimen kezdesip, serýendeýge ýaqyt taýyp júrmiz», deıdi Káýsar.
Ken ornynda merdiger kásiporyndar az emes. Sonyń biri – «Aspar Kashagan» JShS. Bul seriktestiktiń jataqhanalaryna úlkendermen birge 200-den asa bala ornalasqan. Olardyń arasynda mektep jasyndaǵy oqýshylar kóp.
«Biz oqýshylardyń kedergisiz bilim alýyna qajetti jaǵdaıdy jasap, barlyq qoldaýdy kórsete beremiz. Mektep jasyna jetpegen balalar úshin eriktilerdiń kómegimen oıyn-saýyq is-sharalaryn uıymdastyrýdy qolǵa aldyq. Balalar qaýipsizdik pen jaılylyqty sezinip, alańsyz oınaıdy. Olardyń serýendeýine de múmkindik bar», dedi seriktestiktiń óndiristik máseleler jónindegi menedjeri Saltanat Súleımenova.
Atyraý oblysy