Soltústik Qazaqstan oblysyndaǵy Sergeev sý qoımasyndaǵy sýdyń syıymdylyǵy normadan asyp ketken. Mundaǵy sý kólemi ádettegiden 160%-ǵa artyq. Bul sý kóleminiń shekti deńgeıi emes. Qazirgi sátte jınalǵan sýdyń bıiktigi 3,5 metrden asqan. О́ńirdiń 8 aýdanynda jaǵdaı áli de kúrdeli. Kóp aýyldy sý basý qaýpi bar. О́ńirdegi elý joldy sý shaıyp ketti. Sý basqan aýdandardaǵy qaýipsizdikti baqylaý jáne jergilikti turǵyndarǵa kómek qolyn sozý úshin óńirge myńdaǵan Ulttyq ulannyń áskerı qyzmetshisi men polısııa qyzmetkeri qyzmet atqaryp júr.
Máselen, sý tasqynyna qarsy is-sharalardy tolyqqandy júrgizý sekildi ózge de jumystarǵa Ulttyq ulan akademııasynyń 400 kýrsanty tartyldy. Úsh oqý batalonynyń kýrsanttary Prıbrejnyı, Olshanka, Jylyjaı kentterinde jáne «Hromzavod» qalalyq shaǵyn aýdanynda ınertti materıal salynǵan qaptardy daıyndaý jáne olardy jerge tóseý jumystaryna kómek kórsetip jatyr. Olar jaǵalaýdy nyǵaıtý jumystaryna belsendi qatysyp, sý arnasyn burýǵa qolǵabys etip júr. Bul jumystarǵa qosymsha 16 tehnıka jumyldyryldy, onyń ishinde frontaldy tıegish bar. Osy rette akademııa kýrsanttarynyń eńbekqorlyǵyn atap ótken jón. Olar ótken táýlikte 8 200 qum toly qap daıyndap, bıiktigi úsh metr bolatyn 150 metrlik tosqaýyl jasady.
Sonymen qatar Qazaqstannyń batysynda 5546 áskerı bóliminiń 125 sarbazy 10 avtotehnıkanyń kómegimen sý tasqynyna qarsy kúres jumystaryn júrgizip jatyr. Onyń ishinde 50 sarbaz ben ofıser 2 aýysymda polısııa qyzmetkerlerimen birlesip, Qulsary qalasynyń kóshelerinde ıesiz úılerdi tonaýǵa jol bermeý úshin qyzmet atqaryp júr. Sondaı-aq atalǵan áskerı bólimniń 75 sarbazy qazirdiń ózinde 1500-den asa qum salynǵan qap daıyndady. Aıta keteıik, jeke quram munaı kompanııalarynyń biriniń aýmaǵynda ornalasqan, ol turaqty ornalasý pýnktinen 90 km qashyqtyqta.
El astanasynda da sý tasqyny baıqala bastady. Talapker eldi mekenine qaýip tónip tur. Biraq onyń aldyn alý jumystaryna 6636 áskerı bólimniń 70 áskerı qyzmetkeri jumyldyryldy. Olar 2 aýysymda, kúndiz-túni Qostanaı tas joly boıyndaǵy Esil ózeniniń kópirin baqylaýda ustap otyr. Budan bólek, bir jarym myńnan astam qum toly qaptyń kómegimen sý kelýi múmkin jaǵalardy nyǵaıtyp jatyr. Jalpy, sý tasqynynan zardap shekken jáne sý basýy múmkin eldi mekenderde barlyǵy 1500-den astam Ulttyq ulan jaýyngeri qyzmet atqaryp júr. Búginde quqyqtyq tártip áskerleriniń áskerı qyzmetshileri ınertti materıaldar – qum nemese saz toltyrylǵan 185 myńnan astam qapshyq daıyndady jáne olardy qajetti jerlerge tósedi.