Batys pen ońtústik óńirlerden bastaý alǵan sý tasqyny qateri eldiń soltústigine de jyljyp keledi. Taıaý kúnderi elordanyń mańyndaǵy Arshaly aýdanyna qarasty Jibek joly aýylynda da tótenshe jaǵdaı qaýpi týyndady. Aıta keteıik, atalǵan eldi meken Astanadan 26 shaqyrym jerde.
Tasqynnyń aldyn alý maqsatynda Ulttyq ulan 6636 áskerı bóliminiń 140 áskerı qyzmetshisi jáne 6 tehnıkasy eriktilermen birge jumystar júrgizip jatyr. Bólim komandıriniń orynbasary, podpolkovnık Talǵat Qyryqbaevtyń aıtýynsha, ulandyqtar elimizdiń barlyq aımaǵynda qıyndyqqa tap bolǵan halyqqa kómegin aıap jatqan joq. Jibek joly aýylyn qorǵaý maqsatynda da alǵashqylardyń biri bolyp kómekke attanyp otyr.
– Biz tek Jibek joly aýylymen shektelip otyrǵan joqpyz. Elordaǵa jaqyn ornalasqan Talapker aýylynda da áskerı bólimniń 140-qa jýyq áskerı qyzmetshisi sý tasqynynyń aldyn alý sharalary jónindegi jumystardy eki aýysymmen júrgizip jatyr. Ulttyq ulan árdaıym halyqpen birge! – dedi ol.
Jeke quram Jibek joly aýylyndaǵy Qarasý kóshesinde ornalasqan mekteptiń sport zalyna ornalasyp, tamaqtandyrýdy da uıymdastyrǵan. Erjan atty aýyl turǵyny Ulttyq ulannyń áskerı qyzmetshilerine turǵyndardyń atynan alǵysyn jetkizdi.
– 6636 áskerı bólimniń basshylyǵy men sarbazdaryna alǵys aıtamyn. Sý basý qaýpi bizdiń jerimizge de keldi. Degenmen sarbazdar qoldarynan kelgen kómekterin jasap jatyr. «Kúshimiz – birlikte!» degen urandy jalaý etken áskerimizge raqmet. Otan aldyndaǵy boryshtaryn adal atqaryp, aman-esen otbasylaryna oralsyn degen tilegimdi aıtamyn. Elimizdiń aspany ashyq bolsyn, osyndaı sátte aýyzbirshiligimiz ben bir-birimizge degen qamqorlyǵymyzdy kórsetýimiz qajet, – dedi aýyl turǵyny.