Batys Qazaqstan oblysynda tirshilikti qamtamasyz etetin nysandardy qorǵaý sharalary kúsheıtildi. Atap aıtqanda, Oralda «Batys sý arnasy» JShS, «Jaıyqjylýenergo» AQ nysandary men sorǵylaý stansasynda sý tasqynyna qarsy jumystar uıymdastyryldy, dep habarlaıdy Egemen.kz Úkimettiń baspasóz qyzmetine silteme jasap.
Oral qalasynda sýmen jabdyqtaý jumysy 2 túrli kózden júzege asyrylady: jer asty sýlary men Jaıyq ózeni arqyly. Qalanyń 340 myń halqyn sýmen qamtamasyz etetin «Batys sý arnasy» kommýnaldy kásiporny qazir qalypty rejimde jumys istep tur. Máselen, qajetti sý men ony tazalaýǵa arnalǵan reagentter qory jetkilikti deńgeıde. Apatqa qarsy brıgadalar, kásiporynnyń 820 qyzmetkeri men 82 arnaıy tehnıka daıyn tur.
«Jaıyq ózeni boıyndaǵy strategııalyq nysandardy tasqynnan qorǵaý úshin bógetti nyǵaıtý boıynsha jumystar júrgizilip jatyr. Qala turǵyndaryn sýmen qamtamasyz etý jumystary aldyn ala qolǵa alynǵan. Sý tasıtyn arnaıy kólik qarastyrylǵan», dedi «Batys sý arnasynyń» bas ınjeneri Aıan Tasqalı.
«Jaıyqjylýenergosyna» 248 shaqyrymnan astam qalalyq jylý júıesi qaraıdy. Atalǵan nysandardyń aýmaǵynda, onyń ishinde asa qaýipti ýchaskelerde tasqynǵa qarsy jumys sheńberinde qum-qıyrshyq tas qospasymen toltyrý amaldary kúsheıtildi. Tıisti jumystarǵa 180 adam jáne 15 arnaıy tehnıka jumyldyryldy.
Tutastaı alǵanda, Batys Qazaqstanda barlyǵy 20 myń shaqyrymnan astam elektr jelisi bar. Tórt aýdanda 20-dan astam, sondaı-aq Oral qalasynda 16 qosalqy stansa jumys istep tur. Olar qyrda ornalasqandyqtan sý basý qaýpi joq. Buǵan qosa preventıvti amaldar qolǵa alynyp, shahardaǵy eki qosalqy stansada qap tóseý, qorǵanys úıindisin ornatý jumystary qarqyn aldy. Sonymen birge apatqa qarsy brıgadalar, 1400 qyzmetker jáne 140 arnaıy tehnıka daıyn tur.
Osy rette Jaıyq ózeninde ornalasqan sorǵy stansasyn qorǵaý sharalary da qabyldanǵan.
«Jaıyq ózeniniń jaǵasynda «Jaıyqjylýenergo» mekemesin sýmen, sondaı-aq qala halqyn aýyz sýmen qamtamasyz etetin sorǵy stansasy bar. Odan kúndelikti shamamen 60 myń tekshe metr sý alamyz. Bul - strategııalyq nysan. Sondyqtan onyń aınalasyna qap tósep jatyrmyz», dedi Energetıka jáne TKSh basqarmasy basshysy Mıras Múlkáı.
Esterińizge salaıyq, atalǵan oblysta aldaǵy sý tasqynyna daıyndyq sheńberinde qajetti kúsh jumyldyryldy. Tasqynǵa qarsy is-sharalarǵa barlyǵy 6,3 myńnan astam adam men 1,5 myń tehnıka tartyldy. Turǵyn úı alaptaryn nyǵaıtý boıynsha sharalar qabyldanyp jatyr.