Tótenshe jaǵdaılar mınıstrligi ár saǵattyń basynda sý tasqynyna baılanysty jaǵdaıdy baıandap jatyr. OKQ alańynda ótken brıfıngte vedomstvoǵa qarasty Azamattyq qorǵanys jáne áskerı bólimder komıtetiniń aǵa ofıseri Erasyl Saıpash birqatar málimdeme jasady, dep jazady Egemen.kz.
Erasyl Saıpashtyń aıtýynsha, jappaı jumyldyrylǵan kúshter men tehnıkalyq quraldardyń kómegimen 9,7 mıllıon tekshe metrden astam erigen sý sorylǵan. Tasqynǵa tosqyn maqsatynda 2,4 mıllıon qap pen 1,2 mıllıon tonna ınertti materıal tóseldi.
«Osy ýaqytqa deıin 13 543 adam úılerine oraldy. Evakýasııa pýnktterinde 7 014 adam, onyń ishinde 3 144 bala jatyr. Sý tasqyny bastalǵaly bas-aıaǵy 113 693 adam, onyń ishinde 39 922 bala qutqarylyp, evakýasııalandy. 107 613 aýyl sharýashylyǵynan 3570 bas janýar qaýipsiz jerge kóshirildi. 2195 turǵyn úıdiń aýlasyna kirgen sý basqa baǵytqa buryldy», dedi Erasyl Saıpash.
Pavlodarlyq qutqarýshylar Soltústik Qazaqstan oblysynda qarǵyn sýmen kúresip jatyr. Atap aıtqanda, Pavlodar oblysy TJD kúshteri men quraldary turǵyndardy, úı janýarlaryn, basqa da qajetti zattardy evakýasııalaýmen aınalysyp, sý basqan aýdandarǵa azyq-túlik jetkizý boıynsha jumys atqardy. Qutqarýshylar saıajaı ýchaskelerin aralap, jergilikti turǵyndardy evakýasııalaý týraly habardar etip jatyr. Evakýasııa kezinde Ertis óńiriniń Apattar medısınasy ortalyǵynyń qyzmetkerleri Zarechnyı kenti men Petropavl qalasynyń 9 turǵynyn tekserdi. Jumystar táýlik boıy atqarylyp jatyr.
Qazirgi ýaqytta Aqtóbe, Qostanaı, Aqmola, Atyraý jáne Soltústik Qazaqstan oblystarynda 5708 jeke turǵyn úıdi, 1609 aýla aýmaqtaryn jáne 2035 saıajaıdy sý basqan. Avarııalyq-qutqarý jáne sý tasqynyn joıý jumystaryna 34 myń adam, 4242 tehnıka, onyń ishinde 890 sý sorý tehnıkasy, 335 sý kóligi, 19 ushaq jumyldyrylǵan.
Aqmola oblysy Sandyqtaý aýdanyndaǵy sý tasqyny jaǵdaıy:
Sarqyrama ózeniniń arnasynan asýyna baılanysty Sandyqtaý aýdany Kamenka aýylynan aldyn ala 80 adam óz kúshterimen qaýipsiz aımaqqa kóship, barlyǵy týystarynyń úıine ornalasty.
Qutqarýshylar 100-den astam maldy evakýasııalady. JAO jáne TJM kúshterimen ózen deńgeıin baqylaý jumystary júrgizilip jatyr.