Táýelsizdik tańy atqaly beri táýbe deıik, memleketimiz áleýmettik-ekonomıkalyq damý turǵysynan TMD elderi ishinde kóshbasshylyq joldy bastady. Muny, árıne, Elbasy Nursultan Nazarbaevtyń «...aldymen – ekonomıka» qaǵıdasyn ustanyp, birinshi kezekte otandyq ekonomıkany ártaraptandyrý, halyqtyń ál-aýqatyn kóterý saıasatymen baılanystyrýǵa bolady. Derbes memleket atanǵanymyzǵa shırek ǵasyrǵa endi jaqyndasa da bizdiń Qazaqstandy ekonomıkalyq, ınvestısııalyq ahýaly turaqty el retinde tórtkúl dúnıe tanydy, Tuńǵysh Prezıdentimiz Nursultan Nazarbaevty saıasatker, kóshbasshy retinde jahan jurty moıyndady.
Jyl saıyn ulttyq ekonomıkanyń ár salasy qarqyndy damý baǵytynan jańylǵan joq. Elimizde básekege qabiletti sapaly ónimder molynan óndirilýde. Aýyldarda, qalalarda óndiris oryndary kóptep salynýda. Munaı men gaz sekildi tabıǵı shıkizattarymyzdy óndirý ulǵaıǵan saıyn qorshaǵan ortany qorǵaý máselesine kóbirek mán berýdi qolǵa alýymyzdyń qajettigi týyndaıdy. О́ıtkeni, tal besikke balaıtyn tabıǵatymyzdy bir búldirip alar bolsaq, ony ornyna keltirý mashaqaty da, shyǵyny da molaıa túsedi. Tabıǵat aldymen adamzatqa qajet. Ár adam tabıǵatsyz ómir súre almaıdy. Ár adamǵa taza aýa, taza sý qandaı qajet bolsa, tabıǵatqa da adamnyń shynaıy janashyrlyǵy qajet. Tabıǵat – adamnyń eń birinshi qoregi, eń basty emshisi. Qorshaǵan orta – aýa, sý, jer quramy búlinse, adam aǵzasyna zııandy hımııalyq zat óte kóp mólsherde túsip, densaýlyǵy buzylady.
Qorshaǵan ortany qorǵaýdyń basty tásili – el zańdylyǵyn saqtaý, tabıǵı shıkizatty óndiretin kásiporyndardy soǵan úıretý. Elbasynyń ózi Soltústik Kaspıı jobasyn ıgerýshi operator-kompanııalarǵa Kaspııdiń bıologııalyq tepe-teńdigin saqtaý qajettigi jóninde arnaıy tapsyrma bergeni bar. О́ıtkeni, álemde Kaspıı teńizi sekildi bıologııalyq alýan túrliligi erekshe tunyq sý aıdyny kezdespeıdi. Munda qustyń san alýan túri bar, bekire tuqymdas balyqtar ózge sý qoımalarynda kezdespeıtindigimen erekshelenedi.
Atar tańǵa aıtar aq tilegim –aldymen táýelsiz Qazaqstanymyzdyń abyroıy arta bersin, «Qoı ústine boztorǵaı jumyrtqalaǵan» dep babalarymyz aıtqandaı, elimizdegi yntymaq pen birliktiń býyny bekı tússin! Qorshaǵan ortamyzdyń tazalyǵy buzylmasyn, eń bastysy –halqymyzdyń densaýlyǵy myqty bolsyn! Elimiz aman, jurtymyz tynysh, aspanymyz ashyq, ekonomıkamyz ornyqty, tabysymyz tolymdy, baq-berekemiz mol bolǵaı!
Muftah DIAROV,
geologııa-mınerologııa ǵylymdarynyń doktory, UǴA akademıgi, Atyraý oblysynyń qurmetti azamaty.
ATYRAÝ.