Shyraqtyń shytyrmany

2023 jyly túsirilgen «Shyraq» mýltfılmi osy máseleni ashyp kórsetedi. Kartınany 3D formatynda «ARA» anımasııalyq stýdııasy jasap shyǵarǵan. Mahabbat, qamqorlyq, iltı­pat sekildi qundylyqtardy nasıhattaıtyn kórkem týyndy kórermenderdiń ystyq yqylasyna ıe boldy.

Oqıǵa kádimgi shyraqtyń bas­tan keshken oqıǵasyn baıandaıdy. Ol bir úıdiń qarańǵy qoımasynda ómir súrip jatady. Bul qarapaıym otbasynyń túpki bólmesi edi. Dáýleti de, sáýleti de kelisken qazirgi zaman shańyraǵy. Otaǵasy jumystan qoly bosamaıdy, qarbalas. Anasy baqytty otbasy bolý týraly asúıde podkast tyńdaıdy. Al olardyń balalary óz betimen oınap júredi. Bári qalypty qubylysqa aınalǵan. Birge turyp, birge júrgenmen árqaısysynyń álemi ár jaqta júr.

Osy oraıda dramatýrg Ejen Iones­konyń «Taqyrbas áıel» pesasy oıǵa oralady. Biri gazet oqyp, biri shulyq toqyp otyrǵan erli-zaıyptylar bir-birimen áńgimelesip otyrady. Alaıda olardyń dıologteri bir-birimen múlde qabyspaıdy. Quddy árqaısy óz-ózimen sóılesip otyrǵandaı áser qaldyrady. Mysaly, jubaıy «janym, búgin aýa raıy sondaı tamasha bolyp tur» dese, «ıá, aıtpa. Búgingi gazettiń nómiri rasynda erekshe shyǵypty», deıdi. Osyndaı qarama-qaıshylyqqa toly absýrd mýltfılmdegi otbasynda da kórinis tabady.

Shyraq adamdardan qorqady eken. Sondyqtan bólmege tyǵylyp alyp, syrtqa shyqpaıtyn. Onyń dostary – sol bólmedegi jansyz oıynshyqtar. Shyraq olardy óz otbasym dep biletin. Degenmen dostary jansyz zattar bolǵandyqtan, Shyraq olarmen sóılese almaıdy. Bir kúni bólmege úıdegi mysyq kirip kelip, shyraqtyń súıikti dosy — qýyrshaqty alyp ketedi. Shyraq dosyn qutqarý úshin bólmeden shyǵyp, adamdar júrgen bólmege barýǵa májbúr bolady. Qorqynyshyn jeńip, sonyń arqasynda múldem basqa álemge – suryqsyz, jylýsyz adamdar álemine tap bolady.

Anımatorlar endigi kezekte kó­rermenge myna dúnıeni kishkentaı ǵana shyraqtyń kózimen kórsetedi. Enjar ana, samarqaý áke, kóńilsiz bala shyraqtyń tańdanysyn týǵyzady. Birde syrtta daýyl turyp, úıdiń jaryǵyn óshirip tastaıdy. Bir sátke bári gadjetterinen basyn kóterip, qarańǵyda bir-birin izdeıdi. Artynsha ákesi elektr togy óshkende qoldanatyn shyraqty izdeıdi. О́ziniń qajettiligin bilgen shyraq ózin qatty baqytty sezinedi. Otbasy balasyna kóleńkeler oıynyn kórsetip, tátti bir sezimmen uıqyǵa jatady. Shyraq túni boıy olarǵa jaryǵyn tógip, asa zor qýa­nysh­pen balqyp ketedi. Baqyttyń jolynda ózin qurban etedi. Sebebi bul qýanysh soǵan tatıtyn edi. Nebári 24 mınýtqa sozylatyn mýltfılm kórermendi jyly bir oıdyń qushaǵyna qaldyryp ketedi solaısha.

Aqyn Tumanbaı Moldaǵalıev aı­tady: «Adamǵa eń áýeli keregi – bir­aýyz jyly sóz aıtpaǵan soń, ómir qys­qara túsedi», deıdi jaryqtyq. Rasynda, syılyqta shek bolǵanymen, syı­las­tyq­ta shek bolmaıdy. Otbasynyń aýa ra­ıyna da áser etetin osy qaǵıdalar. Meıirim shyraqtaryńyz sónbesin!