Qoǵamda qajyrly eńbekpen shektelmeı, jaqsylyq jasaýǵa asyǵatyn atymtaı jomart azamattar kóp. San saladaǵy el ardaqtylaryn toǵystyratyn «Meıirimdilik kerýeni» baıqaýy isimen úlgi bolǵan talaı myqtyny tanytty. Astanada altynshy jyl qatarynan uıymdastyrylǵan baıqaýda izgilikti tý etken batyl, qamqor, qaıyrymdy jandar marapattaldy.
Bıyl baıqaýdyń respýblıkalyq kezeńine qatysýǵa myńdaǵan úmitker ótinish qaldyryp, «Asar», «Týǵan jer», «Batyl júrek», «Meıirim jolynda», «Qaıyrymdylyq tarıhy» syndy bes atalym boıynsha óńir-óńirden kelgen 46 laýreat marapattalǵan. Aqpanda ótken osy baıqaýǵa elordadan 62 úmitker qatysypty. Respýblıkalyq baıqaýdyń izimen qazir ár óńir ózinshe qaıyrymdy jandarǵa qurmet kórsetip, alǵys aıtýdy bastap ketti. Mysaly, baıqaýdyń Astana qalasyndaǵy laýreattaryn marapattaý saltanatyn ótkizýge Qazaqstan isker áıelder qaýymdastyǵymen qatar qalalyq ákimdik yntaly bolypty.
– Qoǵamnyń tutastyǵyn, eldiń amandyǵyn oılaıtyn izgi nıetti jandar kóp. Sol jaqsy-jaısańdarǵa alǵysymyz sheksiz. Qıyn-qystaý kúnderde súringenge demeý bolyp, jetimin jylatpaǵan halyqpyz. Sol qalpymyzdan tanbaı, qysyltaıańda birimizge-birimiz demeý bolyp kelemiz. Tosynnan kelgen tasqynǵa óńirlerden myńdaǵan erikti, áskerıler tas-túıin jumylyp, turǵyndarǵa járdemdesip jatyr. Gýmanıtarlyq kómek jóneltip jatqandar qanshama? Munyń barlyǵy – qaıyrymdy, meıirban, janashyr, otansúıgish azamattardyń qolynan keletin is. Iá, qaıyrymdy jandar kóbine-kóp baıqaýǵa ótinishti ózderi qaldyrmaıdy. Áriptesteri, dosjarandary bizge habarlap jatady. Biz sol ótinishti qabyldap, shyn janashyr jandardy nazardan tys qaldyrmaýǵa tyrysamyz. О́ıtkeni munyń barlyǵy keıingi tolqyn jas býynǵa úlgi-ónege dep bilemiz, – deıdi Qazaqstan isker áıelder qaýymdastyǵynyń tóraǵasy Raýshan Sársembaeva.
Sonymen «Batyl júrek» atalymynda kóppáterli turǵyn úıdiń 20-qabatyndaǵy qyzdy qutqarǵan Narul Tórequl, qyzyl jalyn sharpyǵan úıden balany aman alyp qalǵan Esen Qarabekov marapattaldy. «Asar» atalymynda kásipker, ınnovator, shyǵarmashylyq stýdııa-atele jetekshisi Madına Danııarova yntalandyrý syılyǵyn aldy. Sol sekildi basqa da atalymdar boıynsha úmitkerlerge syı-qurmet kórsetildi. Janashyr jandardy general-leıtenant Baqytjan Ertaev quttyqtap, alǵys aıtty.
Kóptiń qurmetine bólengen azamattardyń qataryndaǵy Astana qalasy tótenshe jaǵdaılar departamentiniń Azamattyq qorǵaý kapıtany Balnur Shderına sý basqan ólkelerge kómekke attanǵan áriptesterin maqtan tutatynyn aıtty.
– Qazir tótenshe jaǵdaılardy joıý basqarmasynda eńbek etemin. Salada jumys istep júrgenime 8 jyldan asypty. Jyl saıyn Respýblıkalyq oqý-jattyǵý jıyndaryna qatysamyz. Shyńdalamyz. Búgin departamentte eńbek etip júrgen birneshe áriptesimiz marapattaldy. Biraq olardyń basym kópshiligi qazir sý tasqynyna baılanysty Qostanaı, Aqtóbe, Atyraý oblystarynda saparda. Tótenshe jaǵdaı jarııalanǵan aýmaqtarda jumysyn abyroımen atqaryp júr, – dep áriptesterine tabys tiledi B.Shderına.
«Meıirim jolynda» atalymynda marapattalǵan sport janashyry Sáýle Tasbolatqyzy qor ashyp, sporttan alystaǵan oǵlandarǵa qoldan kelgen kómegin kórsetip júrgen jaıy bar. Iá, dúbirli dodalarda jasyndaı jarqyrap, kóptiń aldynda júrgen sportshylardyń ishinde kásibı mansabyn aıaqtaǵan soń, qoǵam nazarynan tys qalyp qoıatyndar kezigedi. Sáýle Tasbolatqyzy osyndaı sportshylardy qoldap, jigerlendirýge tyrysyp baǵady. Uıymdastyrýshylar «Meıirimdilik kerýeni» baıqaýyna qatysqan janashyr jannyń barlyǵy qurmet-qoshemetke laıyq ekenin eske salyp, alǵys aıtty.