Elorda tórinde salynyp jatqan alyp ta teńdessiz kórkem Muz saraıyn qoldanysqa tapsyratyn kún taıap keledi. Astana kelbetin ajarlandyra túsetin ǵajaıyp ǵımarat jurt kóńilin jadyratyp, bas qala qonaqtaryn tamsandyratyny anyq.
Atalǵan kóp salaly tamasha ǵımaratqa baılanysty tapsyrmany 2012 jyly Elbasy Nursultan Nazarbaev Astana qalasyn odan ári ornyqty damytýǵa qatysty ótken alqaly jıynda bergeni belgili. Sodan beri qurylys qarqyndy júrgizilýde. «Bas merdiger retinde Mabco constructions SA kompanııasy atalatyn jaýapty jumystar legin sol 2012 jyldyń qazan aıynda bastap, mejeli belesterdi kelesi jyldyń mamyrynda baǵyndyrýdy kózdeýde. Telim aýmaǵy 12,17 ga jerdi alyp jatsa, jalpy qurylys alańy 86 238,77 sharshy metr kólemdi quraýda. Muz aıdynynyń syıymdylyǵy 10300 oryndy ıelense, balalar akademııasynyń syrǵanaý alqaby 588 oryndy enshileıdi dep josparlanyp otyr. Sýda júzý keshenine kelsek, 53h25 metrlik olımpıadalyq basseın 2252 orynǵa shaqtalsa, 33h25 metrlik úılesimdi júzý jáne sýǵa sekirý basseıni 1135 orynǵa arnalady dep boljanýda», dep áńgimeleıdi «Qazaqstan temir joly» kompanııasy «Iri jobalardy júzege asyrý boıynsha dıreksııasy» fılıalynan.
QTJ qamqorlyǵyndaǵy «Barys» hokkeı klýbyna qýanysh syılaıtyn Muz saraıy Astanadaǵy Turan dańǵylynyń boıynda ornalasqan. Endi sportshylar qarsylas komandany, jankúıer qonaqtardy «úıde» qarsy alýǵa uıalmaq emes. Atap óterlik jaıt, bul «Barys-Arena» sporttyq kesheniniń TMD keńistiginde balamasy joq. Sondaı-aq, eske salar bolsaq, EKSPO-2017 halyqaralyq kórmesiniń qarsańynda birneshe halyqtyq dástúrge baı, mazmuny erekshe salaýatty ómir saltyn ustaný jáne mádenı tynys-tirshilik oshaǵynyń tusaýy kesilmek.
Aldabergen KEMPIRBAEV.