2023 jyly álemdegi baı adamdardyń sany 42 paıyzǵa ósip, 626,6 myń adamǵa jetken. Knight Frank táýelsiz konsaltıngtik kompanııasynyń boljamy boıynsha, 2028 jyldyń sońyna qaraı olardyń sany taǵy 28,1 paıyzǵa ósip, 802,9 myń adamǵa jetedi, dep habarlaıdy Egemen.kz Ranking.kz saıtyna silteme jasap.
Knight Frank kompanııasynyń zertteýine qaraǵanda, dáýletti adamdardyń basym bóligi Soltústik Amerıkada turady: 253,1 myń adam, bir jyl buryn statıstıkaǵa qaraǵanda 7,2%-ǵa kóp. Al Azııa men Eýropada baı adamdardyń sany birshama ósken: 165,4 myń jáne 155,2 myń adamdy quraıdy. Odan keıingi orynda Taıaý Shyǵys (18,8 myń adam), Aýstralııa (17,9 myń adam), Ońtústik Amerıka (13,2 myń adam) jáne Afrıka (3 myń adam).
Aıta keteıik, Belgııa, Saýd Arabııasy, BAÁ jáne Reseı boıynsha statıstıka esepte qamtylmady.
Elder boıynsha asa baı, dáýletti adamdardyń basym bóligi AQSh-ta turady, olardyń jalpy sany - 225,1 myń. Odan keıingi orynda Qytaı - 98,6 myń adam. Bul eki el álemdegi eń baı adamdardyń jartysynan astamyn quraıdy.
Dáýletti adamdardyń sany eń kóp bes eldiń qataryna Germanııa (29 myń adam), Kanada (27,9 myń adam) jáne Fransııa (24,9 myń adam) kirdi.
Aıta keteıik, Qazaqstan Knight Frank kompanııasnyń esebine engen joq, dese de Forbes World's mıllıarderleriniń 2024 jylǵy jańartylǵan reıtınginde alty Qazaqstan azamaty kórindi. Vıacheslav Kım alǵash ret 5,8 mıllıard dollar baılyǵymen Qazaqstannyń eń baı adamy atandy. Odan bólek, Qazaqstannyń eń baı azamaty ataǵyna Tımýr men Dınara Qulybaevtar (árqaısysy 5 mıllıard dollar), Tımýr Týrlov (3,3 mıllıard dollar) jáne Bolat О́temuratov (2,7 mıllıard dollar) ıe.
Qyrmyzy JUMAǴALIQYZY,
EUÝ stýdenti