Kúnnen kún ozyp, ol apta-aıdy, aı jyldy quraıdy. Osylaısha jyl on eki aı aınalyp, ýaqyt alǵa jyljı beredi. Mine, zyrǵyǵan ýaqytpen ilesip, áp degenshe taǵy bir jyldy artqa tastap otyrmyz. Halyqaralyq qalyptasqan Jańa jyl taǵy da esik ashyp endi. Osy túsinikpen aıtsaq, qoı jyly da tabaldyryqtan attady. Qoı qazaq halqymen birge jasap kele jatqan tórt túliginiń biri ǵoı. Atalarymyzdyń ishse – asy, kıse – kıimi bolǵan janýar. «Qoı balasyn súıedi qońyrym dep, eshnárseni bilmeıtin momynym dep», «Qoı ústine boztorǵaı jumyrtqalaǵan zaman» degen sekildi halqymyzdyń aýyz ádebıetinde kezdesetin tirkesterdiń ózi saıyn dalada sharýasyn baqqan qazaqtyń jaýgershiliksiz, tynysh, beıbit ómirdi qalaıtynyn aıtyp turǵandaı seziledi maǵan.
Qoı jyly halqymyz Alladan baq-dáýlet, tynysh ómir tileıdi. Jańa jyldan meniń de tilegim osy – aldymen beıbitshilik bolsyn. Qazirgi kompıýter zamanynda jaqsy habar da, jaman habar da sút pisirim ýaqyttyń ishinde álemniń bar túkpirine tarap jatyr. О́rkenıettiń barlyq keremetin kórip otyrmyz, degenmen, adamzat oılap-tapqan jańalyǵynyń barlyǵy da óziniń jaqsylyǵyna qyzmet etse eken dep tileımin. Jer betindegi adamdar úshin beıbit kúnnen artyq qandaı jaqsylyq bolýshy edi? Ákelerimiz soǵysty kórdi, sol soǵysta sheıit bolǵandar qanshama, aýylǵa múgedek bolyp oralǵandar, jaraqatynan azap shegip qaza bolǵandar qanshama edi?
Men de soǵys jaraqaty janyna batqan maıdangerdiń qyzy edim. Al qazir órkenıetti zamanda Ýkraınadaǵy berekesiz jaǵdaıdy qalaı túsinýge bolady? Dástúri, salty, óneri ádemi halyqtyń toz-tozy shyǵyp jatyr. Alladan halqyma tynyshtyq tileımin, sondaı qıynshylyqty bizdiń halqymyz kórmesin. Onsyz da «myń ólip, myń tirilgen» qazaqtyń kórgen quqaıy az emes qoı. «Aldymen – ekonomıka, sosyn – saıasat» ustanymyn ustaǵan Elbasymyz Nursultan Nazarbaev Qazaqstan halqynyń birligin sóziniń basy etip aıtyp otyrady. Soǵan rızamyn.
Ádette, jyldyń barlyǵy birdeı sharýaǵa qolaıly bola bermeıdi. Kúz jaýyndy bolyp, astyq kesh orylatyn jyldardy bastan talaı ótkerdik. Byltyrǵy jyl dıqanǵa jeńil bolmady. Jazdyń qýańshylyq, kúzdiń jaýyndy bolýy sebepti qostanaılyq dıqandar egindi qar túskende de ordy. Bul aýyldaǵylar úshin mehnaty kóp, shyǵyndy beınet boldy. Ylǵaly mol astyqty osy kúnge deıin keptirý jumystary júrip jatyr. Biraq, shúkir, ash otyrǵan eshkim joq, barlyǵynyń da tileıtini tynysh ómir. Osy kóktemnen barlyǵymyzdyń da úmitimiz mol.
О́tken jyl da jalpy elimizge jaman bolǵan joq. Jaqynda qorytyndylanǵan Údemeli ındýstrııalyq-ınnovasııalyq damý memlekettik baǵdarlamasynyń alǵashqy besjyldyǵy aıasynda óndiris adymdap damydy. Nursultan Ábishulynyń Qazaqstan halqyna joldaǵan «Nurly Jol – bolashaqqa bastar jol» atty Joldaýy búgingi kúnniń josparyndaı seziledi. Bıyl aýyl sharýashylyǵy damyp, aýylǵa basym kóńil bólinse degen tilek bar. Aýyl – tamyrymyz, aýyl – tiregimiz. Qalalar damysyn, biraq aýyldan qol úzýge bolmaıdy. Mańdaıyn kún qaqtaǵan, qoly kústengen aýyldastarymdy oılap otyramyn.
Eldi mekenderdegi tasjol jóndelse, gaz, sý qubyrlary tartylsa, úıler kóbirek salynsa eken. Jaǵdaı jasalsa, oqý bitirgen jastar aýylǵa barǵysy-aq keledi. О́zim búkil sanaly ǵumyrymdy aýylda ótkizip, aýyl sharýashylyǵynda eńbek etken soń, aýylǵa alańdap otyramyn. Aýyl sharýashylyǵy kóterilse, ondaǵy ózekti máseleler sheshimin tapsa degen tilegim bar. Halqymnyń yrys-nesibesi qutaıa bersin.
Jańa jyl elimiz úshin jaqsy, merekeli, berekeli jyl bolady dep bilemin. Beıbit ómirdiń negizi qalanǵan elimizdi kózge basqasha elestetý de múmkin emes. Aldymen Qazaqstandaǵy ult pen ulystardyń tatý-tátti ómirine, jumylǵan judyryqtaı birliginge kóz tımesin deńiz. Ony ózim kúndelikti tirshilikte kórip-bilip otyrmyn. Elimiz Konstıtýsııasynyń, Qazaqstan halqy Assambleıasynyń 20 jyldyǵyn, Uly Otan soǵysyndaǵy Jeńistiń 70 jyldyǵyn atap ótemiz. Mundaı mazmundy, mańyzdy merekeler jas urpaqty patrıotızmge, elin súıýge tárbıeleıdi, rýhanı baıytady, halyq arasyndaǵy birlikti, dostyqty nyǵaıtady. Birlik bolsa, tirlik bolady. Bar adamnyń, bar ananyń tilegi osy.
Kámshat DО́NENBAEVA,
Sosıalıstik Eńbek Eri,
KSRO Memlekettik syılyǵynyń laýreaty.
QOSTANAI.