Aqtóbe oblysynyń polısııasy balalardy emdeýge jınaǵan aqshany zańsyz ıemdendi degen kúdiktini ustady, dep habarlaıdy Egemen.kz.
Polısııaǵa Aqtóbe qalasynyń birneshe turǵyny «More life» qorynyń ókilderine qatysty aryzdandy. Jábirlenýshilerdiń aıtýynsha, qor dırektory emdelýge qarajat jınaýǵa kómek kórsetemin degen syltaýmen aqshany zańsyz ıemdengen. Qylmystyq is boıynsha alty jábirlenýshi ótip jatyr, azamattardan jınalǵan qarjy 30 mln teńgeden asty.
Bir jaǵdaıda, 2023 jyly qor men emdelýge muqtaj balanyń ata-anasy arasynda kelisim jasalǵan.
Qajetti somany jınaǵannan keıin qor ata-anany balasymen birge emdeýge Belarýs Respýblıkasynyń Mınsk qalasyna aqshasyz jibergen. Qor ártúrli syltaýlarmen aqsha aýdarymyn jibermegen. Saldarynan bala tıisti em qabyldamaǵan, al ata-anasy bóten elde kómeksiz qalǵan.
Alaıaqtyq faktisi boıynsha sotqa deıingi tergep-tekserý júrgizilip jatyr. Tergeý jumystary aıasynda tergeý áreketterin júrgizý úshin halyqaralyq tapsyrmalar joldandy. Kúdikti ustalyp, ýaqytsha ustaý ızolıatoryna qamaldy.
Polısııa departamenti atalǵan qordyń áreketinen zardap shekkenderdiń barlyǵyn dereý polısııaǵa habarlasýdy suraıdy.