Oblystyq «Farab» ámbebap ǵylymı kitaphanasy ujymynyń uıymdastyrýymen aqyn Ábilda Aımaqtyń týǵanyna 70 jyl tolýyna oraı «Jyrymmen jubatqym keledi» poezııa aptalyǵy ótti.
Belgili ǵalym Mekemtas Myrzahmetov «Aqyndyq súıegine bitken arqaly aqyn» dep baǵalaǵan Ábilda Aımaqty eske alýǵa arnalǵan aptalyq týǵan jeri Ordabasy aýdanynda bastalyp, oqýshylar arasynda óleń oqýdan saıys ótti. Sondaı-aq kitaphananyń jyljymaly pýnktterinde poezııalyq kerýen uıymdastyrylyp, kitap kórmesi jáne oqyrmandar men kitaphanashylar arasynda avtordyń óleńin oqýdan arnaıy fleshmob bastaý aldy. Al Q.Bektaev jalpy orta mektebinde aýdannyń Qurmetti azamaty, Mádenıet qaıratkeri, «Qurmet» ordeniniń ıegeri, Halyqaralyq Fızýlı atyndaǵy syılyqtyń laýreaty Ábilda Aımaqtyń týǵanyna 70 jyl tolýyna oraı «О́leń maǵan ǵashyq-aý, men óleńge» atty eske alý keshi ótti. Is-shara barysynda áýezdi án shyrqalyp, mektep oqýshylary aqynnyń óleńderin oqydy.
Aqynnyń ómirsheń jyr shýmaqtary jurtshylyq júreginde jattalyp qalǵan, 70-ke jýyq óleńine án jazylǵan. Aqynnyń janyn uǵyp, árdaıym qasynan tabylyp, qolǵanat bolǵan jandar bas qosqan keshte Ábilda Aımaqtyń talǵamy bıik shyǵarmashylyǵy men ómir jolynan estelik aıtyldy. Al shákirtteri aqyn týraly tyń derektermen bólisti. 18 jasynan óleńge qalam tartqan Ábilda Aımaq 22 jyl boıy Jazýshylar odaǵynyń oblystyq fılıalyn basqardy. Talaı shákirt tárbıeledi. Oqyrmandaryna 20-ǵa jýyq kitap syılaǵan aqyn 60 jasynda ómirden ozdy. Qalamgerdiń kitap qazynasy men qoltańbasyn jalǵaýshy jas tolqyn aqynnyń ózi irgetasyn qalaǵan «Temirqazyq» ádebı klýbynyń jumysyn jandandyryp keledi. Eske sala keteıik, Ábilda Aımaq respýblıkalyq, oblys aqyndary arasynda ótken jabyq konkýrs, músháıralarda bas júlde aldy. Al 2003 jyly Fransııada ótken búkil Túrki dúnıesi ádebıetiniń forýmyna qatysty. Túrkııada 2004 jyly ótken Túrki halyqtary aqyndarynyń jabyq konkýrsynda Halyqaralyq Fızýlı atyndaǵy syılyqtyń laýreaty atandy.
Aptalyq qorytyndylanǵan ádebı jıyndy oblystyq mádenıet jáne týrızm basqarma basshysynyń orynbasary Erjan Isataev ashyp, keshke arnaıy kelgen aqynnyń jary Aqmaral Satybaldyqyzyna syı-sııapat kórsetti. О́leńderiniń birinde:
«Men ólgen soń birdeńe bolar ma eken,
Álde dúnıe kórkeıip ońar ma eken?
Baıaǵydaı baılaryń qudaısynyp,
Panasy joq kedeıler tońar ma eken?», degen aqynnyń jary estelikterimen bólisse, nemereleri óleńderinen úzindi oqydy. Kesh qonaqtary aptalyq jaıly oılarymen bólisti. Sonymen qatar mektep oqýshylary aqyn óleńderinen kompozısııa usyndy. Kitaphana dırektory Janat Shardarbekova jyl boıy Ábilda Aımaq oqýlary oblys kóleminde jalǵasatyndyǵyn jetkizdi. Sharaǵa belsene qatysqan oqýshylarǵa alǵyshat tabys etti.
Túrkistan oblysy