Keshe Úkimet úıinde Premer-Mınıstrdiń birinshi orynbasary Baqytjan Saǵyntaev qysqy jylytý maýsymynyń barysy jáne áleýmettik mańyzy bar azyq-túlik taýarlarynyń baǵasy týraly selektorlyq keńes ótkizdi.
Keńes jumysyna mınıstrlikter men memlekettik mekemelerdiń basshylary, oblystar jáne Astana, Almaty qalalarynyń ákimderi qatysty.
Energetıka mınıstrliginiń málimeti boıynsha respýblıka turǵyndaryn elektr jáne jylý qýatymen qamtý turaqty rejimde júzege asyrylýda. О́tip bara jatqan jyl basynan beri elimizde 93 mıllıard kVt. saǵat elektr qýaty óndirilgen. Bul – ótken jylǵydan 2,1 paıyzǵa artyq. Qýat kózderi qoımalarynda 4,5 mıllıon tonna kómir, 157 myń tonna mazýt qory jınaqtalǵan. Bular – qor normasyna sáıkes keletin kórsetkishter. Qýat óndirýshi jáne jetkizýshi kásiporyndardyń negizgi qural-jabdyqtaryna jóndeý jumystary josparǵa sáıkes júrgizilgen.
Áleýmettik mańyzdy azyq-túlikterge negizsiz baǵa ósimin boldyrmas úshin óńirlerdegi atqarýshy organdar baǵany turaqtandyrý boıynsha sharalar keshenin júzege asyrýda.
Ulttyq ekonomıka mınıstrligi oblys ákimdikterimen birlese otyryp baǵa qozǵalysyna turaqty túrde monıtorıng júrgizý ústinde. Azyq-túlik taýarlarynyń óńirlik turaqtandyrý qorlaryn qalyptastyrý men paıdalaný jónindegi jumystar jalǵasýda. Áleýmettik mańyzy bar taǵam túrlerine negizsiz baǵa kóterý, rynok sýbektileri arasynda jasyryn baǵa kelisimin jasasý, saýda nysandaryna otandyq taýar óndirýshilerdiń qatysýyn shekteý oqıǵalary oryn ala qalǵan jaǵdaıda qoldanystaǵy zańdar aıasynda tıisti sharalar qoldanylady. Bútindeı alǵanda, azyq-túlik taýarlarynyń baǵa qozǵalysyna baqylaý júrgizý tetikteri jaqsy jumys isteýde.
Selektorlyq keńeste, sondaı-aq, jańajyldyq mereke kezinde qoǵamdyq tártipti qamtamasyz etý máseleleri de qarastyryldy.
Keńes qorytyndysynda Baqytjan Saǵyntaev tıisti atqarý organdaryna birqatar tapsyrmalar berdi, dep habarlady Premer-Mınıstrdiń baspasóz qyzmeti.
Suńǵat ÁLIPBAI,
«Egemen Qazaqstan».