Qazaqstannyń halyq ártisi, qoǵam qaıratkeri Roza Baǵlanovanyń tutynǵan zattary aýksıonǵa shyqty, dep habarlaıdy Egemen.kz.
Marqumnyń artynda qalǵan uly men kelini elimizdegi sý tasqynynan zardap shekken óńirlerge kómektesýge nıet bildirgen. Osylaısha ańyz tulǵanyń kóziniń tirisinde tutynǵan zattaryn satýǵa shyǵarǵan.
- Apanyń eki zatyn aýksıonǵa usyndyq. Barlyq qarajat qaıyrymdylyqqa jumsalady. Utqan jandarǵa apamyzdyń energııasyn bersin! Yrymdap qolǵabyn kıip, shálisin jamylyp júrsin!, – dep jazdy Roza Baǵlanovanyń kelini Maral Tájibaeva.
“Biz ekeýmiz” fılminiń jabyq kórsetiliminde ártistiń Louis Vuitton brendiniń qolǵaby men qundyz jaǵaly shálisi satylymǵa shyqty. Kórermen túrli baǵany usynyp, sońynda Quralaı Anarbekovaǵa qolǵaby, jýrnalıst Aınur Asanberdige shálisi buıyrdy.