Qos baldyrǵannyń ómirin saqtap qalǵan dárigerlerdiń biliktiligine jetisýlyqtar razy. Kópsalaly oblystyq balalar aýrýhanasyna úsh jasar eki bala ártúrli dene jaraqatymen túsken. Biri tórtinshi qabattan qulap, aýyr jaraqat alsa, ekinshisi septıkke túsip ketken. Mamandar shuǵyl áreket etip, der kezinde birlese kómek kórsetkenniń nátıjesinde balalardy aman alyp qaldy.
О́lim aýzynda jatqan kishkentaı naýqastardy kórgende aq jeleńdilerdiń abdyrap qalǵany ras, áıtkenmen dereý medısınalyq kómek kórsetýge umtylady. Esinen tanyp, tynys ala almaı jatqan balalardy aýrýhanaǵa ýaqytynda jetkizedi.
«Tórtinshi qabattan qulaǵan balanyń mıy shaıqalyp, tómengi jaq súıegi synǵan. Sondaı-aq keýde qýysy, ishi jaraqattanǵan. Balaǵa qajetti kómek kórsetilgennen keıin jansaqtaý bólimine jatqyzdyq. Qazirgi ýaqytta naýqas hırýrgııa bóliminde tolyqtaı em qabyldap, úıine shyǵaryldy», deıdi kópsalaly oblystyq balalar aýrýhanasynyń dırektory Qaırat Ospagalıev.
Sonymen qatar atalǵan aýrýhananyń bas dárigeri septıkke qulaǵan balany qutqarý kezinde onyń es-tússiz kúıde bolǵanyn aıtady.
«Oqıǵa ornyna der kezinde jetken tótenshe jaǵdaı qyzmeti men jedel járdem qyzmetkerleri balaǵa alǵashqy medısınalyq kómek kórsetip, júrek-ókpe reanımasııasyn sátti ótkizdi. Bala septıkte 10-15 mınýttaı bolǵan. Aýrýhanada reanımatolog, travmatolog, hırýrg jáne pedıatr mamandardyń tekserýinen ótkennen keıin bala jansaqtaý bóliminde em qabyldady. Jaǵdaıy turaqtanǵannan keıin hırýrgııa bólimine aýystyryldy. Búginde bala qanaǵattanarlyq jaǵdaıda aýrýhanadan shyǵaryldy», dedi dáriger.
Mamandardyń aıtýynsha, óńirde keıingi úsh aıda 1 371 bala oblystyq balalar aýrýhanasyna dene jaraqatymen túsken. Onyń ishinde 14 jasqa deıingi balalar sany 1 029-dy qurap otyr. Sondyqtan dárigerler ata-analardy balalaryn qaraýsyz qaldyrmaýǵa shaqyrady. О́ıtkeni kóptegen keleńsiz jaǵdaı ata-anasynyń qaraýynsyz qalǵan kezde bolady.
Jetisý oblysy