Aqtóbe oblysy naýryzdyń keıingi onkúndiginen sáýirdiń ortasyna deıin sý tasqynyn bastan keshirdi. Kúnniń kúrt jylynýynan ózender arnasynan shyǵyp, eldi mekenderdi sý basý qaýpi tóndi. Oblys ortalyǵy men alty aýdanda tótenshe jaǵdaı jarııalanyp, myńdaǵan adam sý basý aımaqtarynan shuǵyl túrde kóshirildi.
Qyzyl sýdan qaýip tóngen kúnderi judyryqtaı jumylyp, bir úıdiń balasyndaı áreket etken azamattardyń aldyńǵy leginde volonter jastar júrdi. Olar qalanyń Elek jáne Qarǵaly ózenderi boıyndaǵy 11 baý-baqsha ujymy men turǵyn úı alaptary turǵyndaryn qaýipsiz jerge kóshirýge kómektesti, sý basqan úılerden ózdiginen júre almaıtyn múgedek jandar men qart kisilerdi, jas balalardy, úı janýarlaryn alyp shyǵyp, polısııa qyzmetkerleri men qutqarýshylarǵa járdemdesti. Tasqyn kúnderi Aqtóbe qalasy men alty aýdanǵa 4 myńnan astam volonter kómekke keldi. Sondaı-aq olar qaladaǵy 36 evakýasııalyq bekette jatqandarǵa kıim-keshek, tósek oryn taratyp, azyq-túlik, dári-dármek jetkizdi.
Eriktiler oblys ortalyǵymen shektelip qana qoımaı, aýdandarda da belsendi áreket etti. Máselen, sý basqan Qobda aýdanyna 60 volonter kómekke kelip, adamdardy evakýasııalaýǵa kómektesti. Al tótenshe jaǵdaı jónindegi óńirlik shtab janynda qurylǵan eriktilerdiń front-ofısi qaı jerde kómek kúshi zárý bolsa, sol jerge volonterlerdi jumyldyra bilgen úılestirýshi ortalyqqa aınaldy. Eriktilerdiń qataryna kolledj, joǵary oqý oryndarynyń stýdentterinen basqa túrli mamandyq ıeleri, eresekter de qosyldy. Volonterlik ortalyqtarmen jumys isteıtin zeınetkerler úılerinde as daıyndasa, olardy jastar tasqynmen alysyp, bógetterdi bıiktetip júrgen azamattarǵa taratty.
Qyzyl sýdyń beti qaıtsa da, volonterlerge áli jumys kóp. Qazirgi ýaqytta tasqyn sý zardabyn Yrǵyz aýdanynyń bes aýyly tartyp jatyr. Tosyn qumdarynan kelgen Torǵaı ózeniniń sýy Belsher, Nura, Jaısańbaı, Mamyr, Quıylys eldi mekenderine kirip, turǵyndar Yrǵyz aýdany ortalyǵyndaǵy úsh evakýasııalyq orynǵa kóshirildi. Nura, Belsher, Mamyr aýyldary sý astynda qaldy. Endi Táýip aýyldyq okrýginiń Quıylys jáne Jaısańbaı aýyldaryna qaýip tónip tur. Jurt qoldan bóget úıip, sýdyń osy beldeýden asyp ketpeýi úshin kúni-túni eńbektenip jatyr. О́zen jaǵalaýlaryn bekitýge Aqtóbeden áskerı bólim jaýyngerlerimen birge 100 volonter keldi. Qostanaıdan jetken Torǵaı ózeniniń sýy Quıylys aýylynyń shetinde Yrǵyzben qosylyp, Qurdym degen elsizde qumǵa sińip joǵalady. Qumdaýyt jer bolyp kórinse de, Qurdym – jer asty sýy men jer beti sýynyń qosylatyn tusy. Qurdymǵa qulaǵan sý jer astymen Aral teńizine barady deıdi úlkender.
Volonterler Yrǵyzdaǵy ýaqytsha panalaý oryndarynda jatqan 500 adamdy tamaqtandyrady, oblys ortalyǵynan jetkizilgen gýmanıtarlyq kómekti taratyp beredi. О́ıtkeni Qorǵanys mınıstrliginiń tikushaǵymen shuǵyl kóshirilgen aýyl turǵyndary úılerinen basy artyq kıim de almaı shyqqan. Sý tasqyny halqymyzdyń baýyrmal, meıirimdi, izgilikke toly bir qyryn ashty. Túrli volonterlik uıymdarǵa birikken eriktiler sapynda eline, týǵan qalasy men týǵan jeriniń tabıǵatyna beıjaı qaramaıtyn azamattar kóp eken. Volonterlik qozǵalysqa kún sanap qosylyp jatqan ártúrli jastaǵy azamattarǵa qarap osylaı dep oı túıýge bolady.
Aqtóbelik erikti jastardyń endigi bir toby «Taza Qazaqstan» respýblıkalyq ekologııalyq aksııasyna belsendilikpen kirisken. Olar qystan qalǵan qoqystardy jınap, kóshelerdi, aryqtardy, ózen-kólder boıyn tazalaýmen aınalysyp jatyr. Elimizde bastalǵan jalpyhalyqtyq ekologııalyq aksııaǵa aqtóbelik 80-ge jýyq volonter qatysýǵa nıet bildirgen. Olar ásirese qala men dalada tal egý, gúl otyrǵyzý jumystaryna qatysýǵa yntaly. Sáýir, mamyr aılarynda tabıǵat qorǵaýshy jastardyń bastamasymen Aqtóbe oblysynda «Taza qala – taza jaǵalaý», «Bulaq kórseń – kózin ash», «Ardagerlerdi ardaqtaıyq» taqyrybymen kóptegen is-shara ótkizilmekshi.
Aqtóbe oblysy