Maqsut Narikbayev University basshylyǵy stýdentterdiń bilim-biligin, kásibı daǵdylaryn jetildirýmen qatar jańashyl stýdentterdiń ozyq ıdeıalaryn qoldaıdy.
Birer kún buryn ýnıversıtet ujymy «TRAVEL Hack: Transformative Routes, Adventure, Vision, Exploration and Legacy» taqyrybynda respýblıkalyq hakaton uıymdastyryp, onda eldiń birneshe óńirinen kelgen ozyq oıly stýdentter bas qosqan. Bul is-sharanyń maqsat-muraty – stýdentterdiń startap jobalarymen qatar týrızm salasyndaǵy kásipkerlikti qoldaýǵa negizdelipti. Hakatonǵa Nazarbayev University, Astana International University, Qoja Ahmet Iаsaýı atyndaǵy Halyqaralyq qazaq-túrik ýnıversıteti, Q.Jubanov atyndaǵy Aqtóbe óńirlik ýnıversıteti, AITU, E.Bóketov atyndaǵy Qaraǵandy ýnıversıteti, S.Toraıǵyrov ýnıversıteti, KazUTB, Sh.Esenov atyndaǵy KTIÝ jáne Kazakh-British Technical University-den júzdegen stýdent kelip qatysqan. Baıqaýdyń jalpy júlde qory 1 mln 600 myń teńgeniń shamasynda bolsa, baǵyt-baǵdary erekshe is-sharany qoldaýǵa «Kazakh Tourism» ulttyq kompanııasy nıet bildiripti.
Respýblıkalyq hakatonnyń ashylý saltanatynda Maqsut Narikbayev University rektory Sergeı Pen qatysýshylarǵa tabys tiledi. Bul kúni úmitkerler ekotýrızm, ınklıýzıvti týrızm, kólik kompanııalaryna arnalǵan sheshimder, aǵylshyn tilindegi onlaın gıdter, qonaqúılerge arnalǵan B2B sheshimder, týrıstik avtobýstarǵa arnalǵan marketpleıs sekildi túrli baǵytta joba daıyndady. Sonymen, úzdik ıdeıa, joba-josparlar usynylǵan baıqaýda «Dataflow» komandasy dara shyqty. Olar týrıstik agentterdiń senimdiligin tekseretin táp-táýir joba ázirlepti. Al ekinshi oryndy «Sanatopia» komandasy enshilese, úshinshi oryn «Take over blur» komandasyna buıyrdy. Olar týrıstik avtobýstarǵa arnalǵan qosymsha daıyndaǵan. Júldege qolsozym qalǵan «Fighting» komandasy kórermender kózaıymy atandy.
Baıqaý máresine jete bere ozyq oıly stýndentterdiń eńbegine rıza bolǵan «Kazakh Tourism» basqarma tóraǵasy Qaırat Sádýaqasov týrızmdi damytý baǵytyndaǵy jańashyl ıdeıalardy árkez qoldaıtynyn aıtty.
«Meniń oıymsha, bul hakatonnyń qatysýshylary bolashaqta Nasdaq-ta nemese basqa da bırjalarda satylatyn kompanııalardy quraıdy. Osy jarysqa qatysqan stýdentterdiń álemdik deńgeıdegi sıfrlyq sheshimder oılap tabatyn provaıderler bolatynyna senimim zor. Al biz, «Kazakh Tourism» ulttyq kompanııasy, osy is-sharany qoldaýǵa árdaıym daıynbyz», dedi Q.Sádýaqasov.
Rasymen de, nebir úzdik startap jobalar usynylǵan baıqaýdyń týrızm salasyn damytýda róli mańyzdy. Sondyqtan uıymdastyrýshylar hakaton jańa ıdeıalar men ınnovasııalyq tásilderdiń alańyna aınalady degen senimde.