О́tken ǵasyrdyń ortasynan asa qazaq poezııasyna keremet úrdis ákelgen, úlgi darytqan biri – fılosof, ekinshisi – lırık Qadyr Myrza Áli men Tumanbaı Moldaǵalıev bolatyn. Telqońyrdaı, dombyranyń qos ishegindeı qos talant jer basyp júrse, bıyl seksenniń seńgirine shyǵar edi.
«Sábıdiń saýsaǵyndaı, sózi aqynnyń, Basynan sıpaǵanǵa talpynady» dep bir túıip tastap, odan keıin «Júrekten shyqpasa, Júrekke jetpeıdi» degen tereń maǵynany alǵa tartyp, búkil sanaly ǵumyryn jyr álemine, oıly sóz tereńine arnaǵan Qadyr Myrza Áli aǵamyz kúni keshe seksenge tolar edi. Jetpisinshi jyldary «Kósh» atty tańdamalysynyń betasharyna «Bir sózben aıtqanda, «Kósh» etek-jeńin yqshamdap jınap, biryńǵaı tutas dúnıe, birtutas denege aınalǵan tárizdi. Avtordyń alǵashqy armanynyń ózi osy bolatyn-dy. Qaıtkende de «Kóshimdi» uzaq saparǵa uzatyp salyp, «Dombyramdy» qolyma qaıta alǵan jaıym bar» degen eken.
Qazaqtyń Qadyrynyń qaı kitabyna, tipti jeke shýmaqtarynyń ózine zeıin salsań «biryńǵaı dúnıe, birtutas dene» ekenine kóz jetkizesiń. «Kóshin» uzatyp, «Dombyrasyn» qolǵa alǵannan keıin de nebir ultymyzdyń rýhanııatyn baıytqan týyndylardy halqyna tartý etti. Shyǵarmashylyq salasynda eńbek etýdiń, jınaqy bolýdyń, tııanaqty júrýdiń, tapqyr sózben aınalasyn súıindiretin, súısindiretin, keıde ádepten ozsań, óren júırikteı tap basyp, taýyp aıtyp esińdi kirgizetin estiligi kimge de bolsa úlgi bolatyn. Osyndaı dara darynnyń seksen jyldyǵyna oraı qazaqtyń búkil bitim-bolmysyn óleń órnegine túsirgen uly aqynnyń án tekstine, tolǵap aıtar termesine aınalyp ketken «Qazaqtardy sheteldik qonaqtarǵa tanystyrý» atty óleńin gazet oqyrmandaryna usynyp otyrmyz. Al «Aq otaýdy» jyrǵa toltyrǵan, «Bulbul baǵyn» án áýenine aınaldyrǵan, «Oı ormanymen» áldılegen, «Dombyrasymen» terbegen, «Kókparymen» jelpindirgen, odan keıingi kelisti de kemel shyǵarmalarymen búkil eldi tánti etken Qadyr Myrza Áli týraly maqalalar mereıtoıy atalyp óter tusta jarııalanady.
Qazaqtardy sheteldik qonaqtarǵa tanystyrý
Shopan jigit domalatyp jyǵyp qoı,
Dos keldi dep,
Jasap jatyr ulyq toı.
Tuńǵysh ret kórip tursyń sen ony,
Qazaq degen osy mine,
Bilip qoı!
Sáıgúlikti quıryq-jaly taralǵan
Súıetuǵyn qazaq osy,
Qarańdar!
Qazaq osy:
Kúı shyǵaryp,
Án salyp,
Kókpar tartyp,
Qyz qýýǵa jaralǵan.
Qazaq osy:
Aıtatuǵyn jelge syr.
O, aǵaıyn,
Halyq emes ol kesir.
Qazaq osy:
Ańǵal-sańǵal,
Jabýsyz,
Qazaq osy:
Aǵyl-tegil,
Kól-kósir.
Qazaq osy:
Dala deıtin,
Kún deıtin.
Qazaq osy:
«О́ner aldy – til» – deıtin.
Qazaq osy:
Qarasyń ba,
Aqsyń ba,
Qońyrsyń ba,
Jatyrqaýdy bilmeıtin.
Qazaq osy:
Ashyq-jarqyn qabaǵy.
Qonaq kelse, shabylyp bir qalady.
Baıqa da tur, saǵan da ol keterde
At mingizip,
Jibek shapan jabady.
Qazaq osy:
Kórgeninen tanbaıtyn.
Toı-dýmansyz oty túzý janbaıtyn.
Qazaq osy:
Alýdaı-aq alatyn,
Al berýden
Aldyna jan salmaıtyn.
Qazaq osy:
Quda bol dep qınaıtyn,
Qudalaryn qudaıdaı-aq syılaıtyn.
Qazaq osy:
Dúnıe men malyńdy
Jaqsylap bir shashý úshin jınaıtyn.
Qazaq osy:
Jaıyp jatqan qanatyn.
Batyr halyq,
Aqyn halyq – dál aty.
Qazaq osy:
О́zimsingen adamǵa
Nasybaıǵa bola ókpelep qalatyn.
Shopan jigit domalatyp jyǵyp qoı,
Dos keldi dep jasap jatyr ulyq toı.
Tuńǵysh ret kórip tursyń sen ony,
Qazaq degen osy mine,
Bilip qoı!