Aqtóbe qalasy ákiminiń orynbasary Aıgúl Arynǵazıeva «Aqjar-2» kentinde turatyn 100 jastaǵy Aqjarqyn Turǵanovany Jańa jyl merekesimen quttyqtady. Altyn asyqtaı áje jastaıynan ashtyqty da, Uly Otan soǵysynyń aýyrtpalyqtaryn da bastan ótkergen. Ashtyq jyldary atshońqaı jep aman qalsa, soǵys kezinde saban aıdaǵan, 16 sıyrdy kúnine úsh mezgil saýyp, bozala tań, boztorǵaı shyrylynan oıanyp, tún aýǵansha bel sheshpeı, «Bári maıdan úshin» dep eńbek etken. Keıin ujymshar, keńshar jumysyna atsalysyp, shaly Aıjanǵa kómekshi shopan bolǵan.
Eńbekpen shyńdalǵan keıýana tyń, jady myqty. Balasy Jaqsylyq pen kelini Ámınanyń, nemere-shóbereleriniń baǵym-kútiminiń arqasynda qolyn jyly sýǵa malyp otyrǵan jáıi bar. Uly Jaqsylyq Aıjanov elimizge belgili aqyn. Jarasty otbasynyń uıytqysy Ámına enesi Aqjarqynnyń barlyq baǵym-kútimin kelistirip otyrǵan úlgili kelin.
– Enemmen birge turǵanyma 40 jyl boldy. Erterekte bir aýyrǵanynda qoryqpa, apa, sizdi júzge jetkizbesem Ámına bolmaı keteıin degenim bar edi, soǵan jettim, – dep sóz arasynda ázildep te qoıady.
О́mirden erterek ozǵan shaly Aıjanmen ekeýi qyzy Tynyshtyq pen uly Jaqsylyqty qatarynan kem qylmaı ósirdi. Qazir de solardyń, nemere-shóbereleriniń tileýin tileýden jańylǵan emes. Aqjarqyn keıýana – qyzy men ulynan 15 nemere, 26 shóbere kórip otyrǵan baqytty jan.
Aıgúl Arynǵazıeva ǵasyr jasaǵan keıýanaǵa gúl usynyp, jańajyldyq syılyǵyn tapsyrdy, zor densaýlyq, baqyt tiledi, balalarynyń, nemereleriniń jáne shóbereleriniń qyzyǵyn kóre berýine degen yqylas-nıetin bildirdi.
О́z kezeginde Aqjarqyn áje birinshiden, úkilep baǵyp otyrǵan bala-kelinine, osyndaı baqýatty turmysqa jetkizgen Elbasyna, Memleket basshysynyń úlgisin ilgeri aparyp kele jatqan jergilikti bılikke rızashylyǵyn bildirdi. Elimizge tabys pen tatýlyq, bereke-birlik tiledi.
Aıgúl Arynǵazıevanyń aıtýynsha, sońǵy jyldary 100 jasaǵan, odan uzaq ómir súretinder qatary kóbeıip keledi eken. Iаǵnı, muny adamdardyń ózderiniń týabitti densaýlyǵymen birge, ómirimizdiń jaqsara túskeniniń, sondaı-aq, qazaqstandyqtardyń ómir jasyn uzartýǵa baǵyttalǵan sharalardyń da arqasy deý oryndy bolmaq. Qazir Aqtóbe qalasynyń ózinde ǵana ǵasyr jasaǵan 18 adam turady, olardyń barlyǵy da qalalyq ákimdik tarapynan osyndaı iltıpatqa bólenip, syı-sııapatqa ıe boldy.
Satybaldy SÁÝIRBAI,
«Egemen Qazaqstan».
Aqtóbe.