Qarǵyn sýdan japa shekken aımaq turǵyndaryna gýmanıtarlyq kómek jóneltý aksııasy Shymkentte qarqyndy jalǵasyp keledi. Kúni keshe qaıyrymdylyq is-sharasyna qatysqan túrli uıymnyń saýapty isinen qalys qalmaýdy uıǵarǵan megapolıstiń bedeldi 5 joǵary oqý orny apat bolǵan aımaqtarǵa gýmanıtarlyq júk kólikterin attandyrdy. Osynaý mańyzdy bastamaǵa uıytqy bolǵan – Táshenov atyndaǵy ýnıversıtet basshylyǵy. Qandaı kómektiń jiberilgeni, basqa nendeı qoldaý sharalary qarastyrylǵany jóninde О́zbekáli Jánibekov atyndaǵy Ońtústik Qazaqstan pedagogıkalyq ýnıversıtetiniń strategııalyq damý jáne áleýmettik ister jónindegi prorektory Barshagúl Isabek aıtyp berdi.
«Táshenov ýnıversıtetiniń quryltaıshysy Ońalbaı Aıashevtiń qoldaýymen Shymkenttegi 5 joǵary oqý orny tasqyn sýdan zardap shekken Batys Qazaqstan oblysyna 5 júk kóligimen gýmanıtarlyq kómek jiberdi. Biz sol aımaqtaǵy joǵary oqý oryndarymen tikeleı baılanys jasap, qaýipsiz jerge kóshirilgen jáne apat aımaǵynda turyp jatqan otandastarymyzǵa qandaı kómek qajet ekenin bilip, sol boıynsha materıaldyq járdemniń tizimin jasadyq. Negizinen búgingi tańda ol jaqqa kúrekter, sýsorǵylar, kórpe-tósek, rezeńke etikter qajet eken. Biz solardyń barlyǵyn alyp, salyp jiberdik. Máselen, qyzyl sý basqan aımaqtan evakýasııalanǵan 600 turǵynǵa búgingi tańda kórpe-tósek jabdyqtary, gıgıenalyq zattar, súlgiler, kishkentaı balalarǵa jaıalyqtar kerek ekenin anyqtadyq. Sol qajettilikterdi júk kólikterimen jónelttik. Materıaldyq zattarmen birge tez búlinbeıtin makaron, piste maı sekildi azyq-túlik ónimderin qosa jiberdik. Ár joǵary oqý orny qaıyrymdylyqqa shamamen 5 mln teńgeden jumsady. Sonda megapolıstiń 5 ýnıversıteti 25 mln teńgege gýmanıtarlyq kómek jiberip otyr», dedi ýnıversıtet prorektory.
Sonymen birge atalǵan oqý ornynyń basshylyǵy Arqalyqtaǵy Ybyraı Altynsarın atyndaǵy pedagogıkalyq ınstıtýt ákimshiligimen baılanysyp, úıleri sýǵa ketip, evakýasııalyq ortalyqta qalǵan 21 stýdentke 300 myń teńgeden jalpy somasy 6 mln 300 myń teńge qarajat aýdarypty. Osy oraıda maman osyndaı qıyn kezeńde el basyna kún týǵan shaqta bir-birimizge qolushyn berip, bar qıynshylyqty birlesip eńserý qajettigin eske saldy. Gýmanıtarlyq kómekti jiberýdegi basty maqsat ta sol bolatyn.
Al materıaldyq kómek jibergen joǵary oqý oryndaryn atasaq, olar Táshenov ýnıversıteti, О́zbekáli Jánibekov atyndaǵy Ońtústik Qazaqstan pedagogıkalyq ýnıversıteti, Shymkent ýnıversıteti, Orta Azııalyq ýnıversıtet, sondaı-aq akademık Qýatbekov atyndaǵy Halyqtar dostyǵy ýnıversıteti.
Jalpy, pedagogıkalyq ýnıversıtet ustazdary apat aımaǵyndaǵy turǵyndarǵa qolushyn sozyp, bir kúndik jalaqysyn aýdarǵan. Ol 8,5 mln teńgeni quraıdy. Sonyń 6,3 mln teńgesi Arqalyqtaǵy stýdentterge jiberilse, qalǵan qarajat kásipodaq qoldaýymen tolyqtyrylyp, júk kerýenin jasaqtaýǵa jaratylǵan. Sonda jalpylaı alǵanda atalǵan ýnıversıtet 10 mln teńgege kómek kórsetip otyr. Bul ýnıversıtet tarıhyndaǵy eń aýqymdy qaıyrymdyq is-sharasy dese de bolady. О́z kezeginde ýnıversıtette ismerlikpen, ustalyqpen túrli kıim tigip, buıymdar jasaıtyn ónerli stýdentterdiń jármeńke arqyly dúnıelerin saýdaǵa shyǵaryp, odan túsken qarjyny Soltústik Qazaqstan oblysyndaǵy japa shekken turǵyndarǵa jibersek degen nıetteri bar eken. Osyǵan baılanysty keler aptada joǵary oqý orny ǵımaratynda aýqymdy jármeńke ótedi.
«Ǵylym jáne joǵary bilim mınıstrligi búgingi tańda rektorlarmen, prorektorlarmen kún saıyn jınalys jasap otyr. Biz óz tarapymyzdan japa shekken aımaqtardyń túlekterine arnaıy grant qarastyryp, jataqhanamen qamtamasyz etý jaǵyn qolǵa alatymyz jóninde mınıstrlikke usynysymyzdy joldadyq. Eń bastysy el aman, jurt tynysh bolsyn. О́zimiz alysta bolsaq ta, júregimizben otandastarymyzben birgemiz», deıdi B.Isabek.
Jalpy, Shymkent qalasynda qaıyrymdylyq is-sharasynan eshkim qalys qalyp jatqan joq. Árbir ujym, árbir mekeme hal-qaderinshe kómek qolyn sozýǵa tyrysyp jatyr. Máselen, Qazaqstan musylmandary dinı basqarmasynyń Shymkenttegi fılıaly tósenishter, 3 motorly qaıyq, qum salatyn qaptar, kúrek-saımandar jibergen. Sonymen birge megapolıs meshitteri tasqynnan zardap shekken Qostanaı jurtshylyǵyna 10 mln teńge jınap bergen.
Budan bólek shahardan qarǵyn sýmen alysqan otandastarymyzǵa tehnıkamen járdem kórsetý úshin eki júzdeı tehnıka da jiberildi. Al «Júrekten – júrekke!» qaıyrymdylyq aksııasy aıasynda Qazaqstan halqy Assambleıasynyń músheleri, túrli etnomádenı birlestik uıymdasyp, osymen birneshe ret tonna-tonna materıaldyq kómek jiberýden aıanyp jatqan joq. Máselen, jýyrda Soltústik Qazaqstan oblysyna megapolıstiń etnomádenı birlestikteri 33 tonna gýmanıtarlyq kómek jóneltti. Jalpy, osy kezge deıin Shymkent qalalyq Qazaqstan halqy Assambleıasy Atyraý, Batys Qazaqstan oblystaryna úsh ret gýmanıtarlyq kómek jibergen bolatyn. Onyń jalpy kólemi 60 tonna bolsa, qarajat jaǵynan 40 mln teńgeni qurady. Shymkent qalalyq QHA men isker áıelder qaýymdastyǵy jýyrda kezekti qaıyrymdylyq is-sharasyn ótkizdi. Taǵy da apat aımaqtaryna turmystyq zattar men azyq-túlikterdi tıegen júk kólikteri jolǵa shyqty.
Túrkistan jáne Shymkent Janarmaı quıý stansalary ujymynyń basshysy Perdebaı Myrzashúkirovtiń aıtýynsha, Assambleıa músheleri qaýipsiz aımaqqa kóshirilgen adamdarǵa úrlemeli qaıyq, sýsorǵylar, uzyn rezeńke etikter, qutqarýshy jeıdeler, shamshyraq, kúrek, qolǵap, qubyrshek sekildi qajetti kerek-jaraq zattaryn jóneltken.
«Bul – bizdiń erikti túrde jasap jatqan kómegimiz. Buǵan deıin azyq-túlik ónimderi, túrli turmystyq zatpen kómektestik. Oǵan qosymsha qarjylaı da qoldaý kórsetip jatyrmyz. Aldaǵy ýaqytta el bolyp osy synnan súrinbeı ótetinimizge senimim kámil», dedi ol.
Shymkenttiń eriktileri búginde tek gýmanıtarlyq kómekti jınap qana qoımaı, sý basqan aımaqtarda apatpen kúresip júr.
ShYMKENT