Aıdan-aıǵa jalǵasatyn «Taza Qazaqstan» aksııasy aıasynda Shyǵys jurty jappaı senbilikke shyǵyp júr. «Kıeli meken» dep óńirdegi tarıhı jerlerdi qoqystan tazartyp, jasyl jelek ekti.
«Kıeli meken» aptalyǵynda 250 adam Ulan aýdanyndaǵy Aqbaýyr arheologııalyq kesheniniń aınalasyn tazartyp, kóshetter egildi. Ekologııalyq is-sharany Ulan aýdany ákimdigi men ShQO Jýrnalıster odaǵy fılıaly uıymdastyrdy. Sonymen qatar bul kúnderi tabıǵat janashyrlary mýzeılerdiń aınalasy, О́skemendegi Qabanbaı batyr eskertkishiniń mańyn muntazdaı etti.
Tarıhı eskertkishterdi qorǵaý kúnimen tuspa-tus kelgen «Kıeli meken» aptalyǵynda Ulan aýdanynyń turǵyndary, ákimdik qyzmetkerleri jáne bir top jýrnalıster Qorjynbaı taýynyń bókterindegi Aqbaýyr arheologııalyq kesheni men Besterek ólketaný mýzeıiniń mańyn tazartty, kóshet ekti.
– Búgin tarıhı mańyzy zor «Aqbaýyr» kesheniniń aýmaǵy tazalandy. Ekologııalyq aksııa aıasynda keshen aýmaǵyna 50 túp kóshet, Besterek aýlyndaǵy mýzeı aýmaǵyna 30 túp kóshet otyrǵyzyldy. Sondaı-aq qatysýshylarǵa arnap Ulan aýdanynyń mádenıet qyzmetkerleriniń daıyndaǵan merekelik konserti qoıylyp, as berildi, – deıdi Ulan aýdany ishki saıasat bóliminiń basshysy Qanat Oralbek.
Aıtyp ótkendeı, bul iske jýrnalıster qaýymy da belsene qatysqan. Olar keshenniń kireberisinen tórge qaraı qorshaýdy jaǵalaı Batys Altaıdyń jasyl shyrshasyn otyrǵyzdy.
– Nege ekenin qaıdam, osyndaı kıeli jerler jıi lastanady. Týrısterdiń deni demalý mádenıetin bilmeı me, shashyp ketedi. Sondyqtan osyndaı sharalardy jıi ári keń kólemde uıymdastyrsa, bireý bolmasa, bireýi oılanar edi. Qalamyz da, dalamyz da lastanbas edi. Biz ShQO Jýrnalıster odaǵy fılıalynyń shaqyrtýymen senbilikke keldik. Kóshet otyrǵyzdyq, aınalany tazaladyq, – deıdi oblystyq «Meniń ólkem» gazetiniń tilshisi Valentına Svırdenko.
Ulan aýdanynda uıymdastyrylǵan «Kıeli meken» aksııasy óte joǵary deńgeıde ótti. Aksııa bastalmas buryn aqsaqaldar bata berip, aýdan basshylyǵy aqjarma tilekterin aıtty, jınalǵandarǵa alǵys bildirdi. Jumys kóterińki kóńil kúımen bastalsyn degen nıette Ulannyń kúmis kómeı ánshileri ánnen shashý shashty. Sóıtip, aınaldyrǵan úsh saǵattyń ishinde aınala tap-taza boldy. Igi ister munymen toqtap qalmaı, «Taza Qazaqstan» aksııasy jalǵasyn taba beredi.
Shyǵys Qazaqstan oblysy,
Ulan aýdany