Bank sektorynyń aktıvteri negizinen nesıe portfeliniń 2,6%-ǵa nemese 753,2 mlrd teńgege ósýi esebinen osy jylǵy aqpanda 1,8%-ǵa nemese 0,9 trln teńgege ulǵaıa otyryp (2024 jyldyń basynan beri 1,0%-ǵa nemese 0,5 trln teńgege ósý), 2024 jylǵy 1 naýryzdaǵy jaǵdaı boıynsha 52,0 trln teńgeni qurady. Sonyń ishinde tutynýshylyq nesıeniń shoqtyǵy bıik.
Halyqqa berilgen kredıtter 2024 jylǵy aqpanda 2,2%-ǵa ulǵaıyp, 17,2 trln teńgege jetti. 2024 jyldyń basynan beri 3,4%-ǵa ósken. Ipotekalyq nesıe kólemi 1,3%-ǵa, 5,4 trln teńgege ósse, tutynýshylyq qaryz 2,7%-ǵa, 10,7 trln teńgege deıin artqan.
Ulttyq bank deregi boıynsha, 2022 jyldan bastap bank júıesi ortasha eseppen aı saıyn nesıe portfelin 1,7 paıyzdyq tarmaqqa ulǵaıtqan. 2024 jyldyń aqpan aıynyń sońyndaǵy jaǵdaı boıynsha bank júıesiniń nesıe portfeli 28,4 trln teńge deńgeıinde boldy, bul 2024 jyldyń qańtarymen salystyrǵanda 2,1%-ǵa artyq. Jyldyq mánde nesıe portfeli 2024 jylǵy aqpannyń sońynda 24,2 paıyzdyq tarmaqqa ósti (2023 jyldyń aqpan aıynyń qorytyndysymen salystyrǵanda).
Ekonomıkaǵa eń kóp nesıeni bergen – «Qazaqstan Halyq Jınaq Banki» AQ. Qarjy ınstıtýty jalpy somasy 9,4 trln teńgeni maquldaǵan. Bul ekinshi deńgeıli bankter (EDB) jalpy nesıe portfeliniń 31,9%-yn quraıdy. Odan keıin 4,5 trln teńge somasymen «Kaspi Bank» AQ, 3,2 trln teńge somasymen «Otbasy Bank» AQ jáne 3 trln teńge somasymen «Sentr KredıtBanki» AQ tur. EDB jıyntyq nesıe portfelindegi olardyń úlesi tıisinshe 15,3%, 10,9% jáne 10,3%-dy quraıdy.
Sonymen qatar eń kóp merzimi ótken nesıe bereshegi Kaspi-de jınalyp qalypty. Odan keıin «Qazaqstan Halyq Jınaq Banki» AQ men «First Heartland Jusan Bank» AQ bankteri ornalasqan.
Jalpy, 90 kúnnen asyp ótelmegen nesıe beresheginiń (NPL 90+) kólemi nesıe portfeliniń 3,0%-yn nemese 906 mlrd teńgeni qurap otyr. 2024 jylǵy 1 qańtarda bul kórsetkish 2,9% nemese 863 mlrd teńge deńgeıinde bolǵan.
«Makroekonomıkalyq turǵydan alǵanda nesıe portfeli ósiminiń oń qyry da bar. Birinshiden, bul úrdis Qazaqstanǵa ekonomıkalyq odan ári damý múmkindikterin beredi, onyń óndiristik qýatyn keńeıtýge jáne jańǵyrtýǵa múmkindik ashady. Jumyspen qamtýdyń ósýine jáne halyqtyń ómir súrý sapasyn jaqsartýǵa yqpal etedi», deıdi sarapshylar.
2024 jylǵy aqpannyń qorytyndysy boıynsha bankterdiń taza paıdasy 390 mlrd teńge boldy. Bul 2023 jylǵy aqpanǵa qaraǵanda 18,0%-ǵa kóp. Banktik aktıvterdiń rentabeldiligi (ROA) 2024 jylǵy 1 naýryzdaǵy jaǵdaı boıynsha 4,7%-dy (2023 jylǵy 1 naýryzdaǵy jaǵdaı boıynsha – 3,8%), kapıtal rentabeldiligi (ROE) 35,6%-dy (2023 jylǵy 1 naýryzdaǵy jaǵdaı boıynsha – 31,6%) qurady.